AQSh Xalqaro taraqqiyot agentligi (USAID) orqali 1-iyul kuni O‘zbekistonga qariyb 400 ming dollarlik 131 tonna oziq-ovqat yordami yetkazib berildi. Bu haqda AQShning Toshkentdagi elchixonasi matbuot xizmatiga tayanib, “Gazeta.uz” xabar berdi.
Sabzavot va dukkakli mahsulotlarning ozuqaviy aralashmasidan iborat bo‘lgan mazkur yordam sog‘liqni saqlash va ijtimoiy himoya muassasalari hamda ehtiyojmand uy xo‘jaliklari o‘rtasida taqsimlanadi. Yordamning COVID-19 bo‘yicha karantin xizmatlarini ko‘rsatayotgan, sil kasalligiga chalingan bemorlar davolanayotgan muassasalar, mehribonlik uylari, ruhiy kasalliklar shifoxonalaridagi 30 ming nafardan ortiq fuqaroni qamrab olishi kutilmoqda.
2021-yildan buyon Amerikaning Oziq-ovqat yordamini ko‘rsatish bo‘yicha xalqaro sherikchilik dasturi doirasida O‘zbekistonga 3,5 million dollardan ziyodroq qiymatdagi qariyb 1300 tonnalik oziq-ovqat yordami yetkazib berilgan. Respublikaning barcha hududlarida 240 ming nafardan ziyodroq kishiga 65 million porsiya tarqatilgan.
USAID’ning O‘zbekistondagi vakolatxonasi direktori Mikaela Meredit (suratda) dasturning maqsadi “sog‘lom va samarali hayotni qo‘llab-quvvatlash uchun muvofiq, xavfsiz va to‘yimli ozuqa” taqdim etish yo‘li bilan aholining zaif qatlamlarini yanada qo‘llab-quvvatlashdan iborat ekanini ta’kidlagan.
Yetkazib berilgan Harvest Lentil Pro (ishlab chiqaruvchi — Amerikaning Breedlove Dehydrated Foods kompaniyasi) mahsuloti quritilgan sabzi, piyoz, guruch va yasmiqdan tarkib topgan. Mahsulot organizmni ozuqaviy mikroelementlarni ta’minlash hamda kunlik kaloriya va oqsillar iste’molini oshirish uchun maxsus ishlab chiqilgan bo‘lib, u sovutilmagan holda uzoq muddat saqlash va turli usullarda oson pishirish xususiyatiga ega.
Taqdim etilgan yordam Amerikaning Resource and Policy Exchange notijorat tashkiloti tomonidan Sog‘lom avlod uchun Xalqaro xayriya jamg‘armasi (O‘zbekiston) bilan hamkorlikda tarqatiladi.
Amerika diplomatik vakolatxonasi ma’lumotlariga ko‘ra, so‘nggi 20 yil davomida AQSh O‘zbekiston sog‘liqni saqlash tizimiga 122 million dollardan ziyodroq miqdorda uzoq muddatlik investitsiyalar kiritgan bo‘lsa, umumiy hamkorlik hajmi 1 milliard dollardan oshgan.
Avvalroq O‘zbekiston tashqi ishlar vaziri Abdulaziz Komilov AQShda Xalqaro taraqqiyot agentligi administratori Samanta Pauer bilan uchrashgani to‘g‘risida xabar berilgandi.
Izoh (0)