Qashqadaryo viloyatining Chiroqchi tumanida shifoxonaga murojaat qilgan bemordan kasallik tarixi ochish uchun besh ming so‘m so‘ragan tibbiyot xodimi ishdan olindi. Bu haqda viloyat Sog‘liqni saqlash boshqarmasi axborot xizmati ma’lum qildi.
Ma’lum qilinishicha, ijtimoiy tarmoqlarda tarqalgan videoda chiqish qilgan fuqaro tuman tibbiyot birlashmasining yuqumli kasalliklar bo‘limida ro‘yxatga olish uchun undan besh ming so‘m talab qilishganini, bo‘limda sanitariya talablariga to‘liq rioya etilmayotganini ma’lum qilgan.Mazkur holatni o‘rganib chiqqan viloyat Sog‘liqni saqlash boshqarmasining yozishicha, videodagi voqea tuman tibbiyot birlashmasida o‘tkazilgan yig‘ilishda muhokoma qilingan.
“Aniqlanishicha, 2021-yil 24-iyun kuni Chiroqchi tuman tibbiyot birlashmasi yuqumli kasalliklar shifoxonasi kunduzgi muolaja feldsheri G‘.A. tomonidan bemorga kasallik tarixi ochish uchun 5000 so‘m pul so‘ralgani qayd etilgan. Tuman yuqumli kasallliklar shifoxonasining 2021-yil 1-iyuldagi buyrug‘i bilan G‘.A. bilan tuzilgan mehnat shartnomasi bekor qilindi”, — deyiladi boshqarma axborotida.
Ta’kidlanishicha, tuman tibbiyot birlashmasining yuqumli kasalliklar bo‘limida sanitariya talablariga qat’iy rioya qilinishini ta’minlash borasida tegishli chora-tadbirlar belgilangan.
Izoh (0)