Toshkent shahri Mirobod tumanida vazirlikda ishlashini aytib, fuqaroni 10 ming dollar evaziga o‘qishga kiritib qo‘yishni va’da qilgan shaxs ushlandi. Bu haqda Bosh prokuratura huzuridagi Departament xabar berdi.
Ma’lum qilinishicha, Bosh prokuratura huzuridagi Departament hamda DXXning Mirobod tumani bo‘limlari tomonidan tezkor tadbir o‘tkazilgan. Tadbir davomida muqaddam firibgarlik va boshqa jinoyatlari uchun sudlangan D.A. fuqaro R.ga o‘zini Oliy ta’lim vazirligida ishlashini aytib, uni 10 ming AQSh dollari evaziga Qirg‘izistondagi xalqaro universitetga o‘qishga kiritib qo‘yishni va’da qilgani aniqlangan. D.A. so‘ngra yuqori lavozimda ishlovchi tanishlari orqali R.ning o‘qishini Toshkent Pediatriya institutiga ko‘chirtirib berishga ishontirgan va undan 8 ming dollarni qo‘lga kiritgan.
Qolgan 2 ming dollarni olgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Buxoroda talabaning o‘qishini sirtqi bo‘limga ko‘chirib berish uchun 500 dollar so‘ragan dekan o‘rinbosari ushlangani, Chirchiq davlat pedagogika institutiga o‘qishga kiritib qo‘yish uchun ikki kishidan 9 ming dollar olgan yana bir shaxs qo‘lga olingani, Qoraqalpoq davlat universitetiga o‘qishga kiritib qo‘yish uchun 25 million so‘m talab qilgan assistent ushlangani to‘g‘risida xabar berilgandi.
Izoh (0)