Bir oy ichida Yangi O‘zbekiston universiteti ustavi tasdiqlanib, davlat ro‘yxatidan o‘tkaziladi. Ta’lim jarayoni 2021/2022-o‘quv yilidan boshlanadi. Bu haqda Prezident matbuot kotibi Sherzod Asadov 28-iyun, dushanba kuni o‘tkazilgan brifingda so‘z yuritdi, deya xabar bermoqda “Daryo” muxbiri.
“23-iyun kuni hurmatli Prezidentimiz huzurida Yangi O‘zbekiston universitetini tashkil etishga oid taqdimot o‘tkazildi.
Yodingizda bo‘lsa, davlatimiz rahbari bu haqda Oliy Majlisga murojaatnomasida aytgan edi. Oradan ko‘p vaqt o‘tmasdan, bu ulkan maqsad amalga oshirildi.
Bir narsani aytishim kerak, hurmatli Prezidentimiz bu taqdimotga odatdagidan bir soat oldin keldilar. Chunki kadrlar masalasi, yoshlar tarbiyasi ular uchun eng muhimi. Bu bilan ta’lim sohasi muhokamasiga ko‘proq vaqt ajratishni xohladilar.
Haqiqatan ham, muhokamada yangi universitet faoliyatini yo‘lga qo‘yishga tegishli hamma jihatlar – moliyaviy, tashkiliy, ilmiy-pedagogik, xalqaro hamkorlik masalalari, kirish imtihonlari va ta’lim jarayonlarini tashkil etish choralari – hammasi atroflicha muhokama qilindi. Davlatimiz rahbari ta’lim sohasida katta nufuz va tajribaga ega bo‘lgan, universitetning bo‘lajak hamkori sanaladigan Myunxen texnika universiteti rektori Volfgang Gerrmann hamda “TUM International GmbH” boshqaruvchi direktori Frederike Gettinger bilan ham suhbatlashdilar”, — dedi Asadov.
Uning qayd etishicha, barcha masalalar bo‘yicha aniq to‘xtamga kelingandan keyin Prezident Yangi O‘zbekiston universitetini tashkil etish to‘g‘risidagi qarorni imzolagan.
“Bir oy ichida universitet ustavi tasdiqlanib, davlat ro‘yxatidan o‘tkaziladi. Ta’lim jarayoni shu o‘quv yilidan boshlanadi. Bu universitetda faqat Prezident maktabi bitiruvchilari o‘qiydi, degan xulosaga o‘rin yo‘q. U barcha bilimdon yoshlar uchun ochiq. O‘qish davlat granti va to‘lov-kontrakt asosida bo‘ladi”, — dedi davlat rahbari matbuot kotibi.
Izoh (0)