Toshkentdagi “Shahidlar xotirasi” yodgorlik majmuasida 2021-yil aprel oyi o‘rtalaridan qurilish-ta’mirlash va obodonlashtirish ishlari boshlangan edi. Majmua hududidagi bu ishlar “qatag‘on qurbonlarining merosini chuqur o‘rganish va ular xotirasini abadiylashtirish, ‘Shahidlar xotirasi’ yodgorlik majmuasining zamonaviy va milliy dizaynini yaratgan holda rekonstruksiya qilish hamda Qatag‘on qurbonlari xotirasi davlat muzeyining moddiy-texnik bazasini mustahkamlash maqsadida” boshlangan.
Dastlabki reja bo‘yicha, qatag‘on qurbonlari xotirasi sharafiga qurilgan rotonda rekonstruksiya qilinishi, qurbonlarning nomlari yozilgan ramziy kitob o‘rnatilishi, muzey xodimlari uchun alohida ma’muriy bino, majmua hududida milliy hunarmandchilik va savdo do‘konlari, sayr uchun veloturargohlar, bir qator suhbat joylari, ochiq amfiteatr va Wi-Fi zonasi, bolalar va shaxmatchilar uchun o‘yin maydonchalari va hojatxonalar tashkil etilishi kerak edi. Biroq keyinchalik rotonda ta’miri, ramziy kitob o‘rnatilishi va ma’muriy bino qurilishidan boshqa barcha obyektlar loyihadan chiqarib tashlangan.
Majmua, jumladan, rotondani rekonstruksiya qilish, qatag‘on qurbonlari ism-shariflari yozilgan ramziy kitob o‘rnatish, muzey xodimlari uchun alohida ma’muriy bino qurish uchun Mimar Group kompaniyasi tendersiz tanlab olingan. Qatag‘on qurbonlari xotirasi muzeyini rekonstruksiya qilish uchun esa Ijod-Ijod xususiy korxonasi tanlangan. Majmuadagi obyektlar qurilishi poytaxt hokimligining mahalliy budjeti, shuningdek, poytaxtning boshqa hududlaridagi yerlarni investorlarga sotish hisobidan moliyalashtirilishi rejalashtirilmoqda. Birinchi bosqichda Toshkent hokimligi 20 milliard so‘m ajratadi, ikkinchi bosqichda sarmoyadorlarga lotlarni sotishdan tushgan mablag‘lar, yetmagan qismi esa shahar hokimligi budjetining qo‘shimcha manbalari hisobidan yo‘naltiriladi.
Mavzuga doir: Toshkentdagi “Shahidlar xotirasi” majmuasi hududidagi obyektlar qurilishi qanday moliyalashtiriladi?
Majmuadagi ishlar
“Daryo” muxbirlari obyektda bo‘lib, olib borilayotgan qurilish-ta’mirlash ishlari bilan tanishdi — hudud katta qurilish maydoniga aylangan, biroq obyektdagi mas’ullarning bildirishicha, qurilish-ta’mirlash ishlari davomida birorta daraxt kesilmagan va kesilmaydi ham. Ma’lum bo‘lishicha, majmua hududidagi beton va granit kabi toshlar bilan qoplangan deyarli barcha inshootlar (xususan, favvoralar, to‘siqlar va h.k.) qaytadan boshqa turdagi marmar va granitlar bilan qoplanmoqda; Bo‘zsuvning ikki sohiliga o‘rnatilgan to‘siqlar ham marmar bilan qoplab chiqilmoqda (bungacha to‘siqlarning yuqori qismiga beton plitalar yotqizilgan, asos qismi esa toshlar bilan bezatilgan edi. Kanal ustidan solingan ko‘priklar esa naqshinkor metall panjaralar bilan bezatilmoqda.
Izoh (0)