Toshkent shahriga qo‘shni viloyatlardan kirish bo‘yicha o‘rnatilgan cheklov tez orada o‘zgartirilishi (ehtimol, bekor qilinishi) kutilmoqda. Bu haqda Ichki ishlar vazirligi axborot xizmati “Daryo”ga ma’lum qildi.
Sog‘liqni saqlash vazirligining taklifiga binoan Respublika maxsus komissiyasining qarorlari bilan 2021-yil 28-iyunidan 12-iyuliga qadar Toshkent shahriga qo‘shni viloyatlardan avtotransport (avtobus, avtomobil) vositalari orqali o‘ta zarurat bo‘lmagan hollarda kirish bo‘yicha cheklovlar o‘rnatilishi belgilangandi. Cheklov kimlarga tatbiq etilmasligi ham ishlab chiqilgandi. 27-iyundan boshlab Toshkent viloyatidan Toshkent shahriga olib chiquvchi yo‘llar beton to‘siqlar bilan berkitila boshlangandi. Shaharga kirib-chiqish faqat yo‘l-patrul postlarida tashkil qilinishi kutilayotgandi.
Cheklovlar sabab poytaxtdan Toshkent viloyati hududiga chiquvchi avtobuslar harakati YPX post maskanigacha tashkil qilinishi haqida “Toshshahartransxizmat” axborot ham bergandi.
IIV axborot xizmatining “Daryo”ga xabar qilishicha, 27-iyun kuni tunda “ushbu to‘siqlarni joriy etmaslik bo‘yicha topshiriq kelgan”. Ayni damda amalda Toshkent shahriga kirish va chiqish bo‘yicha cheklovlar yo‘q. Maxsus komissiyaning Toshkentga kirishni cheklash bo‘yicha avvalgi qaroriga yangi qaror bilan o‘zgartirishlar kiritilishi mumkin. Ma’lumotlarga ko‘ra, qaror kelishish jarayonida, yaqin vaqt ichida rasman e’lon qilinishi kutilmoqda.
28-iyun kuni Toshkent viloyatidan Toshkent shahriga o‘tgan “Daryo” muharriri yo‘l-patrul postida hech qanday cheklovlar qo‘llanmayotganiga guvoh bo‘lgan. Ammo shaharga olib chiquvchi ko‘chalarga o‘rnatilgan beton to‘siqlar hozircha olinmagan.
Xabar chop etilgandan so‘ng IIVning rasmiy Telegram-kanalida “O‘zbekiston Respublikasi Maxsus komissiyasining Toshkent shahriga kirish-chiqish bo‘yicha rasmiy cheklovlari bilan bog‘liq o‘zgarishlar faqatgina rasmiy manbalar orqali e’lon qilinishi” ma’lum qilindi. “Rasmiy bo‘lmagan ma’lumotlarni tarqatmasligingizni so‘raymiz”, — deyiladi IIV axborot xizmati xabarida.
Izoh (0)