Бир ой ичида Янги Ўзбекистон университети устави тасдиқланиб, давлат рўйхатидан ўтказилади. Таълим жараёни 2021/2022-ўқув йилидан бошланади. Бу ҳақда Президент матбуот котиби Шерзод Асадов 28 июнь, душанба куни ўтказилган брифингда сўз юритди, дея хабар бермоқда «Дарё» мухбири.
«23 июнь куни ҳурматли Президентимиз ҳузурида Янги Ўзбекистон университетини ташкил этишга оид тақдимот ўтказилди.
Ёдингизда бўлса, давлатимиз раҳбари бу ҳақда Олий Мажлисга мурожаатномасида айтган эди. Орадан кўп вақт ўтмасдан, бу улкан мақсад амалга оширилди.
Бир нарсани айтишим керак, ҳурматли Президентимиз бу тақдимотга одатдагидан бир соат олдин келдилар. Чунки кадрлар масаласи, ёшлар тарбияси улар учун энг муҳими. Бу билан таълим соҳаси муҳокамасига кўпроқ вақт ажратишни хоҳладилар.
Ҳақиқатан ҳам, муҳокамада янги университет фаолиятини йўлга қўйишга тегишли ҳамма жиҳатлар – молиявий, ташкилий, илмий-педагогик, халқаро ҳамкорлик масалалари, кириш имтиҳонлари ва таълим жараёнларини ташкил этиш чоралари – ҳаммаси атрофлича муҳокама қилинди. Давлатимиз раҳбари таълим соҳасида катта нуфуз ва тажрибага эга бўлган, университетнинг бўлажак ҳамкори саналадиган Мюнхен техника университети ректори Вольфганг Геррманн ҳамда «TUM International GmbH» бошқарувчи директори Фредерике Геттингер билан ҳам суҳбатлашдилар», — деди Асадов.
Унинг қайд этишича, барча масалалар бўйича аниқ тўхтамга келингандан кейин Президент Янги Ўзбекистон университетини ташкил этиш тўғрисидаги қарорни имзолаган.
«Бир ой ичида университет устави тасдиқланиб, давлат рўйхатидан ўтказилади. Таълим жараёни шу ўқув йилидан бошланади. Бу университетда фақат Президент мактаби битирувчилари ўқийди, деган хулосага ўрин йўқ. У барча билимдон ёшлар учун очиқ. Ўқиш давлат гранти ва тўлов-контракт асосида бўлади», — деди давлат раҳбари матбуот котиби.
Изоҳ (0)