Колумбияда номаълум ҳужумчилар президент Иван Дуке ўтирган вертолётни ўққа тутди. Бу ҳақда Дуке ўзининг матбуот хизмати Twitter’ида маълум қилди, деб ёзмоқда «Коммерсантъ».
«Мамлакатга шуни маълум қилишни истардимки, Сардинатадаги ишларимни тугатиб, Кукута шаҳрига қўнишга яқин турганимизда президент вертолётига ҳужум уюштирилди», — дейилади давлат раҳбарининг твитида. Президент буни қўрқоқларча қилинган ҳужум деб атади.
Noticias Caracol телеканалининг хабар беришича, вертолётда президент билан бирга мудофаа вазири, ички ишлар вазири, департамент губернатори ва Кукута мери бўлган. Вертолётга камида олти марта ўқ узилган. Ҳеч ким зарар кўрмаган.
Аргентина Ташқи ишлар вазирлиги Колумбия президентининг вертолётига қилинган ҳужумни қоралади.
«Аргентина Ташқи ишлар вазирлиги Колумбия Республикаси президенти Иван Дуке ўтирган вертолётга қилинган ҳужумни қаттиқ қоралайди ҳамда президент ва унинг атрофидагилар хавф остида эмаслигидан мамнунлигини қайд этади. Колумбия халқи ва ҳукумати билан бирдамликда мамлакатимиз зўравонликни қатъий рад этишини яна бир бор таъкидлайди», — дейилади ТИВ веб-сайтида эълон қилинган баёнотда.
Шунингдек, Мексика ҳам ушбу ҳужумдан кейин Колумбия билан бирдамлигини билдирди. Мексика ташқи ишлар вазири Марсело Эбрард бу ҳақда Twitter орқали маълум қилган.
«Колумбия президенти учаётган вертолётга қилинган ҳужум муносабати билан Колумбия халқи ва унинг президентига ўз бирдамлигимизни билдирамиз. Мексика зўравонликни рад этади ва Колумбиянинг демократик институтларини қўллаб-қувватлайди», — деб ёзади дипломат.
Ўз навбатида, Колумбия раҳбари мамлакатда фаолият юритаётган барча жиноий гуруҳларга қарши кураш давом эттирилишини таъкидлаган.
Изоҳ (0)