AQShda Minneapolis shahar politsiyasining sobiq xodimi Derek Shovin qora tanli Jorj Floydning o‘limida aybdor deb topilganidan so‘ng 22,5 yilga ozodlikdan mahrum qilindi. Bu haqda Reuters xabar berdi.
Politsiyachi afroamerikalikni 2020-yilning may oyida hibsga olish chog‘ida o‘ldirgandi. Qo‘lga olish paytida Derek Shovin tizzasi bilan Floydning bo‘ynini bosib, sakkiz daqiqacha shu holatda turgan, afroamerikalik nafas ololmayotgani haqida bir necha marta aytgani kor qilmagan.
Buning ortidan mamlakat bo‘ylab huquq-tartibot organlari shafqatsizligi va irqiy tengsizlikka qarshi ommaviy norozilik namoyishlari avj oldi va Black Lives Matter (“Qora tanlilarning hayoti muhim”) harakati paydo bo‘ldi.
Sobiq politsiyachining sud jarayoni mart oyining oxirida boshlandi. Aprel oyida hakamlar hay’ati Shovinni uchta band bo‘yicha aybdor deb topdi: qasddan sodir etilmagan ikkinchi darajali qotillik (og‘irlashtiruvchi holatlarsiz), ehtiyotsizlikdan odam o‘ldirish va inson hayotiga nisbatan bexosdan o‘limga olib keladigan qo‘pol hurmatsizlik.
Prokuratura Shovinni 30 yilga ozodlikdan mahrum qilishni so‘ragan, ular Floydni hibsga olishda politsiyachi tomonidan qo‘llanilgan usul o‘limga olib kelganini ta’kidladi. Advokatlar, o‘z navbatida, Floyd politsiyachining xatti-harakati tufayli emas, balki sog‘lig‘i va giyohvand moddalarni iste’mol qilgani sababli vafot etganini da’vo qildi.
25-iyun kuni bo‘lib o‘tgan sud majlisida Shovin Floydning oilasiga hamdardlik bildirdi va u huquqiy masalalar hal qilinmagani sababli to‘liq bayonot bera olmasligini aytdi.
Shovinga o‘qilgan hukmdan xabar topgan AQSh prezidenti Jo Bayden: “Men ko‘rib chiqilgan barcha holatlarni bilmayman, lekin fikrimcha, ko‘rsatmalarga muvofiq, bu (hukm) o‘rinli ko‘rinadi”, — dedi.
Shovin bilan birga Floydni hibsga olishda ishtirok etgan yana uch politsiyachi huquq-tartibot organlaridan chetlashtirildi. Ular 2022-yil mart oyida sud oldida javob beradi.
Mavzuga doir:
- Marhum Jorj Floyd oilasiga 27 mln dollar miqdorida kompensatsiya to‘lanadi
- AQSh sudi qora tanli Jorj Floydni o‘ldirgan sobiq politsiyachiga qarshi ayblovlarning bir qismini bekor qilish masalasini qayta ko‘rib chiqadi
- AQShda qora tanli Jorj Floydning o‘limiga sabab bo‘lgan Minneapolis politsiya departamenti tarqatib yuborildi
- The New York Times “qora” so‘zini bosh harf bilan yozadigan bo‘ldi
Izoh (0)