Huawei kompaniyasi o‘tgan yili taqdim etilgan MatePad T10 planshetining bolalar uchun moslashtirilgan Huawei MatePad T10 Kids Edition versiyasini taqdim etdi, deb xabar beradi IXBT.
9,7 dyuymli ekranga ega bo‘lgan model silikondan ishlangan zarbga bardoshli maxsus g‘ilof va shunga mos stilus bilan jihozlangan.
Maxsus Kids Corner interfeysi bolalar uchun mo‘ljallangan dasturlar, funksiya va kontentdan foydalanish imkoniyatini beradi. Shuningdek, bolalar uchun Azoomee servisiga yillik obunani taqdim etadi, u yerda maxsus ta’lim dasturlari va kontentlar o‘rin olgan. Ota-onalar planshet ishini farzandiga moslab sozlay oladi.
Agarda bola planshetni og‘ziga solmaydigan va uni yerga tashlamaydigan darajada yetarlicha katta yoshda bo‘lsa, g‘ilofni yechib qo‘yib, qurilmaning standart sozlamalaridan foydalanish mumkin bo‘ladi. Umuman olganda, katta yoshdagi bolalar va butun oila uchun ham qator funksiyalar mavjud.
Planshet HD sifatni qo‘llab-quvvatlaydigan 9,7 dyuymli IPS ekran, SoC Kirin 710A protsessori, 2 gigabayt tezkor, 16/32 gigabayt ichki xotiraga, shuningdek, 2 va 5 megapikselli kameralarga ega bo‘lgan. Akkumulyator sig‘imi 5100 mA/soat. Qurilma 4G LTE, Wi-Fi, Bluetooth 5.0 va GPS bilan jihozlangan. Google servis va dasturlari o‘rniga Huawei’ning muqobil servislaridan, jumladan, AppGallery onlayn dasturlar do‘konidan foydalanilgan.
Huawei MatePad T10 Kids Edition planshetining narxi 200 dollarni tashkil etadi.
Avvalroq Huawei kompaniyasi HarmonyOS, uchtalik kamera, 29 ta antenna, 8 ta dinamik va keng sig‘imli akkumulyatorga ega planshetni taqdim etgandi.
Izoh (0)