Ijtimoiy tarmoqlarda Toshkent viloyatining Parkent tumanida IIB xodimlari fuqaroga kuch ishlatgani tasvirlangan video tarqaldi. IIV matbuot xizmati mazkur holatga munosabat bildirib, voqea aslida qanday bo‘lgani to‘g‘risida ma’lumot berdi.
Ma’lum qilinishicha, 23-iyun kuni tungi xizmatga jalb etilgan Parkent tumani IIB Huquqbuzarliklar profilaktikasi bo‘limi profilaktika inspektorlari katta leytenant R.Nishonov va leytenant J.Mirtolipov soat 20:00 larda “Istiqbol ”mahallasi hududida joylashgan savdo do‘konlari oldida yoshi 35-40 larda bo‘lgan erkak kishi spirtli ichimlik iste’mol qilib o‘tirganini ko‘rgan.
Fuqaro o‘zini 1983-yilda tug‘ilgan O.T. deb tanishtirgan. Profilaktika inspektorlari fuqaroga jamoat joyida spirtli ichimlik iste’mol qilish mumkin emasligi haqida tushuntirishganida, ichki ishlar organlari xodimlariga nisbatan qo‘pol muomalada bo‘lib, atrofdagi fuqarolarni e’tiborini jalb etish maqsadida xodimlarga uyatli so‘zlar bilan so‘kingan, ularning tinchlanish talablariga bo‘ysunmagan hamda IIBga borishdan bosh tortgan.
Qoidabuzarning shaxsini aniqlash va huquqbuzarlikni rasmiylashtirish maqsadida fuqaro O.T. majburiy tarzda tuman IIBga olib kelingan.
Mazkur holat yuzasidan fuqaro O.T.ga nisbatan Ma’muriy javobgarlik to‘g‘risidagi kodeksning 183-moddasi (mayda bezorilik), 187-moddasi (jamoat joylarida alkogol mahsulotini iste’mol qilish) hamda 194-moddasi (ichki ishlar organlari xodimining qonuniy talablarini bajarmaslik) bo‘yicha hujjatlar rasmiylashtirilib, hozirda tergovga qadar surishtiruv olib borilmoqda.
“Shu o‘rinda, fuqarolarga, qonunbuzarlikni bekitish yoki jamoatchilikka o‘zini jabrdiyda qilib ko‘rsatish maqsadida haqiqiy voqelikni yashirish, montaj qilingan videoroliklarni tarqatish orqali javobgarlikdan qutulib qolishga intilish amaliyoti hech qanday yordam bermasligini eslatib o‘tamiz. Qilmishi uchun har bir fuqaro qonun oldida javob beradi”, — deyiladi IIV xabarida.
Avvalroq Xorazmda YPX xodimi yo‘l o‘rtasida haydovchini to‘xtatib olgani aytilgan video bo‘yicha izoh berilgan, Gulistonda mast holda jamoat tartibini buzib, IIB xodimlariga qarshilik ko‘rsatgan shaxs 5 sutkaga qamalgan, Qashqadaryoda MIB xodimi faoliyatiga qarshilik ko‘rsatgan fuqaro qamoqqa olingan edi.
Izoh (0)