2020-yilning oktabrida Sirdaryo viloyatining Sayxunobod tumanida istiqomat qiluvchi ayol o‘zining 8 yoshli qiziga noma’lum erkak tomonidan axloqsiz harakatlar amalga oshirilgani yuzasidan shikoyat qildi. “Sukut saqlama” loyihasining ma’lum qilishicha, kuni kecha ushbu erkakka nisbatan sud hukmi o‘qilgan.
O‘shanda qizning onasi 15-iyul kuni 8 yoshli qizi uyi yaqinidagi do‘konga chiqqani, u yerdan qizni noma’lum erkak velosipedda 35-sonli maktabga olib ketganini ma’lum qilgandi. Qizaloqning aytishicha, erkak uni maktab hojatxonasiga olib kirib, yechintirgan va axloqsiz harakatlarni amalga oshirgan. Ularni payqab qolgan maktab qorovuliga esa, erkak qizaloq singlisi ekani va hojatga chiqqisi kelganini aytgan. Shundan so‘ng, erkak qizni velosipedga o‘tqazib, ko‘cha boshiga tashlab ketgan va bu haqda onasiga hech nima demasligini ta’kidlagan.
Ayol bu bo‘yicha Ichki ishlar organlariga murojaat qilgan. Qizaloq suratlardan erkakni tanigan. Ekspertiza qizning tanasi va kiyimlaridan hech qanday izlarni topmagan. Uning so‘zlariga ko‘ra, gumonlanuvchi 28 yoshli mahalliy fuqaro (oldin sudlangan, uylanmagan) bo‘lib chiqqan. Jinoyatchini tanish vaqtida u o‘ziga lezviya tortib yuborgan.
2021-yilning 22-iyun kuni gumonlanuvchi Jinoyat kodeksi 119-moddasi (jinsiy ehtiyojni zo‘rlik ishlatib g‘ayritabiiy usulda qondirish) 4-qismi bilan aybdor deb topilib, 10 yil-u 1 oyga ozodlikdan mahrum qilindi.
Shuningdek, yigit o‘ta xavfli retsidivist deb e’lon qilingan.
Avvalroq Toshkentda liftda voyaga yetmagan qizlarga tegajog‘lik qilgan erkak 1,5 yilga qamalgani to‘g‘risida xabar berilgandi.
Izoh (0)