Xitoy hukumatining kriptovalyuta sohasiga nisbatan kiritgan yangi talablari maynerlarni o‘z faoliyatini qanday qilib kengaytirish va boshqa mamlakatlarga borish haqida o‘ylashga undadi, deb yozadi Bloomberg’ga tayanib Spot. Ayni holat dunyodagi eng yirik kriptobirjasi bo‘lgan va yirik mayning maydonini boshqaradigan Binance kompaniyasida ham kuzatildi.
“BTC.com” ma’lumotlariga ko‘ra, bitkoinni mayning qilishda ishlatiladigan hisoblash birligi – heshreyt so‘nggi bir necha hafta ichida taxminan 40 foizga kamaydi. Bunga Xitoy hukumatining maynerlarga qo‘ygan yangi talablari ham ta’sir qilgani bo‘lishi mumkin.
Agar hozirda bitkoinlarning 65 foizi Xitoydagi mayning fermalarida olinishini hisobga olinsa, yuqoridagi ko‘rsatkich tez orada 50 foiz va undan pastroqqa tushishi mumkin. ETF Amplify Transformational Data Sharing tahlilchilariga ko‘ra, xitoylik maynerlar yaqin orada AQSh, Kanada, Shvetsiya, Argentina va Markaziy Osiyodagi mamlakatlarga ko‘chib o‘tishi mumkin.
Yaqinda kripto valyuta mayningi bo‘yicha yetakchi kompaniya bo‘lgan BIT Mining Limited Qozog‘istonga mayning uskunalarining birinchi partiyasini yetkazib bergani ham buni qisman tasdiqlaydi. Mamlakatda maksimal hash kuchi 18,2 PH/sekund bo‘lgan 320 ta uskuna 27-iyunga qadar ishga tushiriladi. Ikkinchi va uchinchi partiya 1-iyulga qadar yetib kelishi kutilmoqda.
Xitoylik maynerlar Qozog‘iston bilan cheklanib qolmasligi mumkin. Prezident Shavkat Mirziyoyev 2018-yilda “Raqamli iqtisodiyotni rivojlantirish to‘g‘risida”gi farmonni imzolagandan so‘ng mamlakat maynerlarni xursand qiladigan imijga ega bo‘ldi.
Garchi ushbu farmonning oz qismi amalga oshirilgan va mayningni legallashtirish hali to‘liq hal etilmagan bo‘lsa-da, O‘zbekiston hali ham jahon standartlari bo‘yicha elektr energiyasi tariflarining pastligi sababli potensial jozibali joy bo‘lib qolmoqda, deyiladi xabarda.
Bundan avval Qozog‘istonlik maynerlar soliqlar sabab O‘zbekistonga ko‘chib o‘tishi mumkinligi haqida xabar berilgandi.
Izoh (0)