Ижтимоий тармоқларда Тошкент вилоятининг Паркент туманида ИИБ ходимлари фуқарога куч ишлатгани тасвирланган видео тарқалди. ИИВ матбуот хизмати мазкур ҳолатга муносабат билдириб, воқеа аслида қандай бўлгани тўғрисида маълумот берди.
Маълум қилинишича, 23 июнь куни тунги хизматга жалб этилган Паркент тумани ИИБ Ҳуқуқбузарликлар профилактикаси бўлими профилактика инспекторлари катта лейтенант Р.Нишонов ва лейтенант Ж.Миртолипов соат 20:00 ларда «Истиқбол »маҳалласи ҳудудида жойлашган савдо дўконлари олдида ёши 35-40 ларда бўлган эркак киши спиртли ичимлик истеъмол қилиб ўтирганини кўрган.
Фуқаро ўзини 1983 йилда туғилган О.Т. деб таништирган. Профилактика инспекторлари фуқарога жамоат жойида спиртли ичимлик истеъмол қилиш мумкин эмаслиги ҳақида тушунтиришганида, ички ишлар органлари ходимларига нисбатан қўпол муомалада бўлиб, атрофдаги фуқароларни эътиборини жалб этиш мақсадида ходимларга уятли сўзлар билан сўкинган, уларнинг тинчланиш талабларига бўйсунмаган ҳамда ИИБга боришдан бош тортган.
Қоидабузарнинг шахсини аниқлаш ва ҳуқуқбузарликни расмийлаштириш мақсадида фуқаро О.Т. мажбурий тарзда туман ИИБга олиб келинган.
Мазкур ҳолат юзасидан фуқаро О.Т.га нисбатан Маъмурий жавобгарлик тўғрисидаги кодекснинг 183-моддаси (майда безорилик), 187-моддаси (жамоат жойларида алкоголь маҳсулотини истеъмол қилиш) ҳамда 194-моддаси (ички ишлар органлари ходимининг қонуний талабларини бажармаслик) бўйича ҳужжатлар расмийлаштирилиб, ҳозирда терговга қадар суриштирув олиб борилмоқда.
«Шу ўринда, фуқароларга, қонунбузарликни бекитиш ёки жамоатчиликка ўзини жабрдийда қилиб кўрсатиш мақсадида ҳақиқий воқеликни яшириш, монтаж қилинган видеороликларни тарқатиш орқали жавобгарликдан қутулиб қолишга интилиш амалиёти ҳеч қандай ёрдам бермаслигини эслатиб ўтамиз. Қилмиши учун ҳар бир фуқаро қонун олдида жавоб беради», — дейилади ИИВ хабарида.
Аввалроқ Хоразмда ЙПХ ходими йўл ўртасида ҳайдовчини тўхтатиб олгани айтилган видео бўйича изоҳ берилган, Гулистонда маст ҳолда жамоат тартибини бузиб, ИИБ ходимларига қаршилик кўрсатган шахс 5 суткага қамалган, Қашқадарёда МИБ ходими фаолиятига қаршилик кўрсатган фуқаро қамоққа олинган эди.
Изоҳ (0)