Toshkent viloyati O‘rta Chirchiq tumanida tibbiyot birlashmasi xodimlarini majburiy mehnatga jalb etgan muassasa rahbari jarimaga tortildi. Bu haqda Bandlik va mehnat munosabatlari vazirligi matbuot xizmati xabar berdi.
Ijtimoiy tarmoq orqali “Shifokorlarni qadriga yetmagan yurt!” sarlavhasi ostida tarqalgan video bo‘yicha Toshkent viloyati Bandlik bosh boshqarmasi Davlat mehnat inspeksiyasi tomonidan o‘rganish ishlari o‘tkazilgan.
O‘rganishlar davomida 15-iyun kuni Toshkent viloyati O‘rta Chirchiq tumani tibbiyot birlashmasi 55-sonli oilaviy poliklinikasi rahbari 7 nafar xodimni poliklinika hududini tozalash ishlariga majburan jalb etgani aniqlangan. Shu sababli unga nisbatan Ma’muriy javobgarlik to‘g‘risidagi kodeksning 51-moddasi (mehnatga ma’muriy tarzda majburlash) 1-qismiga asosan bazaviy hisoblash miqdorining 50 barobari (12,25 million so‘m) miqdorida ma’muriy jarima qo‘llanilgan.
Avvalroq xodimini haqorat qilgan O‘rta Chirchiq obodonlashtirish boshqarmasi boshlig‘i ishdan olingani, Shahrisabzda tibbiyot xodimlari majburiy mehnatga jalb qilingani to‘g‘risidagi xabarni bosh shifokor rad etgani to‘g‘risida xabar berilgandi.
Izoh (0)