Chorsu bozorida sifatsiz go‘sht mahsulotlari sotish bilan shug‘ullanib kelayotgan shaxs aniqlandi

Toshkent shahri Shayxontohur tumanida joylashgan “Eski jo‘va” (Chorsu) dehqon bozorida sifatsiz go‘sht mahsulotlari aniqlandi, deya xabar bermoqda Bosh prokuratura huzuridagi departament matbuot xizmati.

Departamentning Shayxontohur tuman bo‘limi tomonidan tuman Veterinariya bo‘limi xodimlari bilan hamkorlikda tumandagi “Eski jo‘va” dehqon bozorida o‘tkazilgan tekshiruvda fuqaro J.T. tegishli hujjatlari bo‘lmagan sifatsiz go‘sht mahsulotlarini sotish bilan shug‘ullanib kelayotganligi aniqlanib, jami 72,5 kilogramm mol go‘shti ashyoviy dalil sifatida olingan.

Mazkur holat yuzasidan Jinoyat kodeksining 186-moddasi (xavfsizlik talablariga javob bermaydigan tovarlarni o‘tkazish maqsadini ko‘zlab ishlab chiqarish, saqlash, tashish yoxud o‘tkazish, ishlar bajarish yoki xizmatlar ko‘rsatish) bilan jinoyat ishi qo‘zg‘atilib, tergov harakatlari o‘tkazilmoqda.

Bundan avval Qarshidan Toshkentga 500 kiloga yaqin noma’lum hayvonga tegishli go‘sht olib ketilayotgani aniqlangani, Buxoroda qo‘lbola tayyorlangan iste’molga yaroqsiz yog‘ mahsulotini sotayotgan shaxs qo‘lga olingani hamda Buxorodan Toshkentga 3 tonnaga yaqin iste’molga yaroqsiz go‘sht olib ketilayotgani aniqlangani haqida xabar berilgandi.