Тошкент вилояти Ўрта Чирчиқ туманида тиббиёт бирлашмаси ходимларини мажбурий меҳнатга жалб этган муассаса раҳбари жаримага тортилди. Бу ҳақда Бандлик ва меҳнат муносабатлари вазирлиги матбуот хизмати хабар берди.
Ижтимоий тармоқ орқали «Шифокорларни қадрига етмаган юрт!» сарлавҳаси остида тарқалган видео бўйича Тошкент вилояти Бандлик бош бошқармаси Давлат меҳнат инспекцияси томонидан ўрганиш ишлари ўтказилган.
Ўрганишлар давомида 15 июнь куни Тошкент вилояти Ўрта Чирчиқ тумани тиббиёт бирлашмаси 55-сонли оилавий поликлиникаси раҳбари 7 нафар ходимни поликлиника ҳудудини тозалаш ишларига мажбуран жалб этгани аниқланган. Шу сабабли унга нисбатан Маъмурий жавобгарлик тўғрисидаги кодекснинг 51-моддаси (меҳнатга маъмурий тарзда мажбурлаш) 1-қисмига асосан базавий ҳисоблаш миқдорининг 50 баробари (12,25 миллион сўм) миқдорида маъмурий жарима қўлланилган.
Аввалроқ ходимини ҳақорат қилган Ўрта Чирчиқ ободонлаштириш бошқармаси бошлиғи ишдан олингани, Шаҳрисабзда тиббиёт ходимлари мажбурий меҳнатга жалб қилингани тўғрисидаги хабарни бош шифокор рад этгани тўғрисида хабар берилганди.
Изоҳ (0)