Isroil bosh vaziri Naftali Bennett mamlakatda koronavirus yangidan avj olayotganini ma’lum qildi, deb yozadi Reuters.
Isroil Sog‘liqni saqlash vazirligining ma’lumotlariga ko‘ra, mamlakatda kunlik kasallanish soni ikki baravardan ko‘proqqa oshib, 125 taga yetgan. Bu mamlakatda so‘nggi ikki oy ichida qayd etilgan eng yuqori sutkalik ko‘rsatkichdir.
Virus yuqtirishning aksariyat holatlar Isroil maktablariga to‘g‘ri kelayotgani sababli ba’zi munisipalitetlar maktablar uchun niqob rejimini majburiy qilishga qaror qildi. Kasallikning so‘nggi holatlari o‘rganib chiqilganda fuqarolarning bir qismi yangi paydo bo‘lgan Delta shtammini yuqtirgani ma’lum bo‘ldi.
“Olingan ma’lumotlardan kelib chiqib, biz vaziyatni kasallikning yangi avj olishi sifatida ko‘rib chiqmoqdamiz”, — dedi Bennett. U isroilliklarni iloji boricha mamlakat tashqarisiga chiqishdan saqlanishga va yopiq joylarda niqob taqishga chaqirdi.
Bosh vazirning so‘zlariga ko‘ra, yaqin kelajakda Isroil chegarasini kesib o‘tish masalalarida jiddiy o‘zgarishlar yuz berishi mumkin va yangi ehtiyot choralari doirasida chegaralardagi taqiqlar uzaytirilishi mumkin.
Eslatib o‘tamiz, Isroil vaksinatsiya bo‘yicha dunyoda yetakchi davlatlardan biriga aylandi. 2021-yil aprel oyi boshiga kelib mamlakatda voyaga yetgan aholining deyarli 80 foizi emlangan edi. Aholiga ko‘chada niqob taqish majburiyati bekor qilindi. Aprel oxiriga kelib mamlakat kasalxonalaridagi koronavirus bo‘limlarining barchasi yopildi.
Iyun oyining boshlarida Isroilda kasallanish darajasi doimiy pasayib borayotgani sababli, barcha karantin cheklovlari va binolardagi niqob rejimi bekor qilindi. Ommaviy va ko‘ngilochar muassasalar faoliyatiga qo‘yilgan cheklovlar olib tashlandi, endi do‘konlar va restoranlarda COVID-19’ga qarshi emlanganlik to‘g‘risidagi hujjat talab qilinmaydigan bo‘ldi.
Izoh (0)