Европа Иттифоқи Қрим ва Севастополга қарши киритган санкциялари муддатини бир йилга — 2022 йил 23 июнгача узайтирди. Бу ҳақда Европа Кенгаши веб-сайтига таяниб, «РБК» хабар берди.
«Амалдаги чеклов чоралари Европа Иттифоқига Қрим ёки Севастополда ишлаб чиқиладиган товарларнинг мақсадли импортини, шунингдек, Қрим ёки Севастополдаги инфратузилма ёки молиявий инвестициялар ва туризм хизматларидан фойдаланишни тақиқлайди», — дейилади хабарда.
Чекловлар, шунингдек, Қрим компанияларига транспорт ёки телекоммуникация ва энергетика соҳаларида ёки нефть, газ ва минерал ресурсларни қидириш ва ишлаб чиқаришда фойдаланиш учун маълум товар ва технологияларни экспорт қилишни ўз ичига олади.
Қримга қарши биринчи иқтисодий санкциялар 2014 йил июнь ойида жорий қилинган эди. Ўшанда Европа Иттифоқига 250 дан ортиқ турдаги Қрим товарлари, шу жумладан, минераллар, углеводородлар, денгиз суви ва туз эритмалари импорти тақиқланди. Кейинчалик рўйхат бир неча бор кенгайтирилди. 2020 йил кузида Европа Иттифоқи санкциялар рўйхатига Қрим кўприги қурилишида иштирок этган икки жисмоний ва тўртта юридик шахсни қўшди.
2014 йил март ойида Қримда референдум бўлиб ўтган, унда яриморол аҳолисининг аксарияти Россияга қўшилишни қўллаб-қувватлаган. Украина ва бир қатор Ғарб давлатлари овоз бериш натижаларини тан олмайди ва содир бўлган воқеаларни «аннексия» (босиб олиш) деб ҳисоблайди. АҚШ Қримнинг Россияга қўшилишини ҳеч қачон тан олмасликка сўз берган. Россия ҳукумати бир неча бор Қрим масаласи тарихан ёпиқ эканини таъкидлаган.
Изоҳ (0)