16-iyun kuni 00:30 larda Jizzax viloyati Zomin tumanida o‘zaro janjallashayotgan ikki fuqaroni ajratishga uringan yigitlar pichoqlandi. Bu haqda IIV matbuot xizmati xabar berdi.
Ma’lum qilinishicha, tumanning “Obihayot” qishlog‘ida yashovchi D.B. ismli fuqaro Nexia’sida choyxonada o‘tirgan ukasi, amakivachchasi va hamqishlog‘ini olib uyiga ketayotgan vaqtida “Oqtepa” mahallasidagi do‘kon oldida turgan tanishini ko‘rib qolgan.
Haydovchi yigit o‘sha tanishi bilan so‘rashish uchun oldiga boradi va o‘rtada o‘zaro kelishmovchilik yuzaga kelgan. Haydovchining ukasi va amakivachchasi ham janjalga aralashib, kaltaklanayotgan yigitning uch nafar sinfdoshi ularni ajratishga harakat qilgan. Haydovchi esa mashinasida bo‘lgan oshxona pichog‘i bilan sinfdoshlardan biri — J.X.ning qorin qismiga urib, jarohat yetkazgan. Shuningdek, D.B. fuqaro J.X.ning ukasini (10-sinf o‘quvchisi) oyog‘iga ham pichoq sanchib olgan.
Oqibatda jabrlanuvchilar tuman tibbiyot birlashmasining shoshilinch bo‘limiga yotqizilgan.
Holat yuzasidan Jinoyat kodeksining 277-moddasi (bezorilik) 3-qismi “g” bandi bilan jinoyat ishi qo‘zg‘atilib, D.B. hibsga olingan. Ayni vaqtda tergov harakatlari olib borilmoqda.
Avvalroq Urgutda “Jiguli” va Captiva haydovchilari bir-biriga yo‘l bermasligi oqibatida janjal kelib chiqqani va oqibatda ikki kishi jarohatlangani, Navoiyda mast aka-uka restoranda janjal ko‘tarib, ofitsiantning bo‘yniga o‘roq sanchib olgani to‘g‘risida xabar berilgandi.
Izoh (0)