Moskva va Moskva viloyati hokimiyati majburiy ommaviy vaksinatsiyani boshlash haqida e’lon qildi. Tegishli qarorlar ikki mintaqaning bosh sanitariya shifokorlari tomonidan imzolangan, deb yozadi Meduza.
Xabarga ko‘ra, davlat va xususiy tashkilotlarning quyidagi sohalarida ishlaydigan xodimlar koronavirusga qarshi vaksina bilan majburiy emlanishi kerak:
- savdo;
- fitnes klublari va go‘zallik salonlari;
- umumiy ovqatlanish;
- maishiy xizmatlar (kir yuvish, kimyoviy tozalash vositalari);
- jamoat transporti va taksilar;
- ta’lim, sog‘liqni saqlash va ijtimoiy himoya;
- uy-joy kommunal xo‘jaligi va elektrotexnika;
- ommaviy sport tadbirlari;
- madaniy tadbirlar (shu jumladan muzeylar va kutubxonalar);
- ko‘ngilochar tadbirlar.
Ta’kidlanishicha, yuqoridagi tashkilotlarning rahbarlari 15-iyulgacha o‘z xodimlarining kamida 60 foizini koronavirusga qarshi vaksinaning birinchi dozasi bilan emlashni tashkil qilishi lozim. 15-avgustga qadar esa jami xodimlarning kamida 60 foizi ikkinchi doza bilan emlanib bo‘lishi kerak. Faqatgina emlanmaslik to‘g‘risida tibbiy ko‘rsatmaga ega kishilar vaksina olmasligi mumkin.
Moskva meri Sergey Sobyanin qarorni izohlar ekan, emlanish har kimning shaxsiy ishi ekanini, ammo jamoat orasida yuradiganlar o‘zlari istamagan holda epidemiologik jarayonning sherigiga aylanib qolishini aytdi.
“Agar siz behisob odamlarga xizmat ko‘rsatadigan tashkilotda ishlasangiz, epidemiya holatida qanday turdagi shaxsiy himoya vositalaridan foydalanishingizdan qat’i nazar, bu (vaksinatsiya) endi sizning shaxsiy ishingiz emas”, — dedi Sobyanin.
Shahar savdo va xizmat ko‘rsatish bo‘limi boshlig‘i Aleksey Nemeryukning ta’kidlashicha, majburiy emlash masalasi biznes bilan muhokama qilingan va ko‘plab tadbirkorlar “o‘zlari ushbu yechimni taklif qilgan”.
“Interfaks”ning hukumatdagi manbasi xabar berishicha, mamlakat bo‘ylab majburiy vaksinatsiya hali rejalashtirilmagan. “Bu masala har bir mintaqadagi epidemiologik vaziyatga qarab hal qilinadi”, — deydi agentlik manbasi.
“Majburiy vaksinatsiya hali joriy qilinmagan, bu haqda biror gap ham yo‘q”, — dedi o‘z navbatida prezident matbuot kotibi Dmitriy Peskov.
Rossiyada so‘nggi ikki hafta ichida koronavirus bilan kasallanishning keskin o‘sishi kuzatildi: may oyi oxirida har kuni to‘qqiz mingga yaqin kishida infeksiya qayd etildi, iyun o‘rtalariga kelib bu raqam 13-14 mingga yetdi.
Moskvada ushbu davrda kasallanish darajasi ikki baravarga oshdi. Shaharda koronavirusga chalinganlar ko‘payib ketgani sababli yangi cheklovlar kiritildi. Moskva meri Sergey Sobyanin 2021-yil 15-iyundan 19-iyungacha ish haqi saqlanib qolgan holda, shaharda dam olish kunlari deb e’lon qildi. Sergey Sobyanin ma’lum qilishicha, Moskvada koronavirus infeksiyasining tarqalishi bilan bog‘liq vaziyatning murakkablashishi sababli shahar kasalxonalarida minglab koykalar koronavirus bemorlariga moslashtirilmoqda.
Moskva ortidan Sankt-Peterburg ham 17-iyundan COVID-19 cheklovlarini kuchaytirmoqda.
Izoh (0)