Korrupsiyaga qarshi kurashish agentligi may—iyun oylaridagi davlat xaridlari bo‘yicha masofaviy monitoring natijalarini ma’lum qildi.
Unga ko‘ra, budjet buyurtmachilari tomonidan qiymati 101,5 milliard so‘mlik 324 ta tanlovda “Davlat xaridlari to‘g‘risida”gi va “Raqobat to‘g‘risida”gi qonunlarning talablari buzilishiga yo‘l qo‘yilganligi aniqlandi.
Qonunchilik talablari buzilgan tanlovlardan 72 tasi (24,6 milliard so‘m) tuman (shahar) hokimliklari, 71 tasi (20,9 milliard) Xalq ta’limi vazirligi, 61 tasi (17,9 milliard) Sog‘liqni saqlash vazirligi, 33 tasi (11,1 milliard) Maktabgacha ta’lim vazirligi, 24 tasi (7,9 milliard) Oliy va o‘rta maxsus ta’lim vazirligi, 9 tasi (3,6 milliard) Suv xo‘jaligi vazirligi va qolgan 54 tasi (15,5 milliard) boshqa vazirlik va idoralar hisobiga to‘g‘ri keladi.
Viloyatlar kesimida Andijonda 20,0 milliard so‘mlik (51 ta), Samarqandda 12,8 milliard so‘mlik (52 ta), Jizzaxda 8,3 milliard so‘mlik (20 ta), Buxoroda 7,3 milliard so‘mlik (33 ta), Qashqadaryoda 7,2 milliard so‘mlik (20 ta), Surxondaryoda 7,9 milliard so‘mlik (30 ta), Xorazmda 5,3 milliard so‘mlik (18 ta), Navoiyda 5,2 milliard so‘mlik (16 ta), Namanganda 2,6 milliard so‘mlik (11 ta), Farg‘onada 2,0 milliard so‘mlik (10 ta), Qoraqalpog‘iston Respublikasida 3,4 milliard so‘mlik (11 ta) va Toshkent shahrida 19,5 milliard so‘mlik (51 ta) tanlovlar bo‘yicha davlat xaridlariga oid qonunchilik talablari buzilganligi ma’lum bo‘ldi.
Monitoring yakunlari bo‘yicha budjet buyurtmachilari tomonidan e’lon qilingan 101,5 milliard so‘mlik 324 ta tanlovni bekor qilish haqida vazirlik va idoralarga 268 ta taqdimnoma kiritildi.
Bundan avval O‘zbekistonda 2 yil ichida 120 ming gektardan ortiq yer hokimlar tomonidan maqsadsiz berilgan yoki talon-toroj qilingani, Qashqadaryodagi bog‘chalarda 2021-yilning dastlabki 4 oyida 400 million so‘mdan ortiq mablag‘ talon-toroj qilingani hamda Toshkentda MIB xodimi ikki yilda 596 million so‘mni o‘zlashtirib yuborgani ma’lum bo‘lgani haqida xabar berilgandi.
Izoh (0)