Qashqadaryodagi bog‘chalarda 2021-yilning dastlabki 4 oyida 400 mln so‘mdan ortiq mablag‘ talon-toroj qilindi

Qashqadaryodagi bog‘chalarda 2021-yilning dastlabki choragida 400 million so‘mdan ziyod mablag‘ talon-toroj qilindi, deya xabar bermoqda viloyat hokimligi axborot xizmati.

Ma’lum qilinishicha, viloyatda 1694 ta maktabgacha ta’lim tashkiloti bor.

Qayd qilinishicha, viloyatda maktabgacha ta’lim tashkilotlari sonini ko‘paytirish orqali ularda bola qamrovini oshirish, yangi ish o‘rinlarini yaratish, davlat tomonidan berilayotgan imtiyozlardan samarali foydalanishni yo‘lga qo‘yish ishlari bir necha bor ogohlantirishlarga qaramasdan o‘z samarasini bermayapti.

Jumladan, 2019-yilda 248 million so‘m talon-toroj qilinib, 21 million so‘m noto‘g‘ri xarajat qilingan. 2020-yilda 326 million so‘m talon-toroj qilinib, 120 million so‘m noto‘g‘ri sarf qilingan, 2021-yilning birinchi choragida esa 412 million so‘m talon-toroj qilinib, 205 million so‘m budjet mablag‘lari noto‘g‘ri sarf qilingan.

Bundan avval Toshkentda MIB xodimi ikki yilda 596 million so‘mni o‘zlashtirib yuborgani ma’lum bo‘lgani, Buxoroda fermer xo‘jaliklariga ajratilgan salkam 150 million so‘mlik dizel yoqilg‘isini talon-toroj qilgan shaxslarga jinoyat ishi qo‘zg‘atilgani hamda Jizzax viloyati hokimining sobiq o‘rinbosari Akram Rahmonqulov va uning 10 nafar jinoiy sheriklari qamoqqa olingani ma’lum qilingani haqida xabar qilingandi.