O‘zbekistonda aholining jismoniy tayyorgarlik holati baholanadi

O‘zbekistonda 2021-yil 1-avgustdan aholining jismoniy tayyorgarlik darajasini baholash tizimi joriy etiladi. Bu haqda 16-iyun kuni imzolangan “Aholining jismoniy tayyorgarlik darajasini baholash tizimini joriy etishning tashkiliy chora-tadbirlari to‘g‘risida”gi Prezident qarorida ko‘zda tutilgan.

Bundan aholining barcha qatlamlari o‘rtasida jismoniy tarbiya va sportni ommalashtirish orqali jismoniy qobiliyat va harakat faolligini takomillashtirish hamda zararli odatlar va turli kasalliklarning oldini olish, shuningdek, sog‘lom turmush tarzi ko‘nikmalarini shakllantirish va jismoniy tayyorgarlik darajasini oshirish maqsad qilingan.

Hujjatga ko‘ra, baholash tizimi bo‘yicha sport sinovlari maxsus va ixtiyoriy ravishda aholining 7 yoshdan 70 yoshgacha bo‘lgan qatlami va undan kattalarning jismoniy tayyorgarligini aniqlaydi. Sport sinovlari har yili bir marotaba o‘tkaziladi. Bunda, sport sinovlari ishtirokchilariga 11 ta yosh toifasi bo‘yicha egallagan o‘rni va darajasiga qarab sport razryadlari va unvonlari beriladi.

Shuningdek, sport sinovlarining maxsus talablarini muvaffaqiyatli bajarganlarga bir yil davomida quyidagi imtiyozlar beriladi:

• safarbarlik chaqiruvi rezervidagi harbiy xizmat to‘lovining 50 foizini to‘lash va muddatli harbiy xizmatga yuborishda ustunlik;
• 1 o‘rin egalariga “Temurbeklar maktabi”ga sinovlarsiz kirish;
• bepul tarzda ko‘p tarmoqli tibbiyot muassasasida ko‘rikdan o‘tish;
• umumiy foydalanishdagi transportda bepul hamda hududlararo harakatlanishda 50 foizlik chegirma berish;
• sovrindorlarning farzandlarini umumta’lim maktabi, maktabgacha ta’lim tashkilotlari va yozgi sog‘lomlashtirish oromgohlariga navbatsiz joylashtirish;
• barcha davlat organlari va tashkilotlarining xodimlariga ish joyi hisobidan dam olish maskanlari va sanatoriylarga bepul yo‘llanmalar taqdim etish;
• ishga yoki o‘qishga kirishda jismoniy tayyorgarlik talab etiladigan imtihon, sinov, amaliy mashg‘ulotlarida ustunlik berish.

2021-yil 1-avgustgacha sport sinovlarining platformasi (www.jtdss.uz) va yagona elektron bazasi faoliyati yo‘lga qo‘yiladi.