Toshkentda MIB xodimi ikki yilda 596 mln so‘mni o‘zlashtirib yuborgani ma’lum bo‘ldi

Bosh prokuratura 2019-yilda pul mablag‘larini talon-toroj qilib, o‘z shaxsiy ehtiyojlari uchun ishlatib yuborgani uchun jazolangan MIB xodimi bilan bog‘liq jinoyat ishi tafsilotlariga oydinlik kiritdi. Bu haqda xabar “Xabar.uz”da e’lon qilingan.

Ma’lum qilinishicha, 2019-yil yanvar oyida MIB rahbariyati tashabbusi bilan byuroning Toshkent shahar boshqarmasi tizimida tekshirish o‘tkazilgan.

Tekshirishda MIBning Toshkent shahar boshqarmasi moliya-xo‘jalik bo‘limi depozit hisob varaqalari bilan ishlash guruhi Bektemir tumani bo‘yicha yetakchi mutaxassisi M.U. 2017-yildan 2019-yil fevral oyiga qadar depozit hisobvarag‘iga kelib tushgan, jami 586,4 million so‘mni talon-toroj qilib, o‘z shaxsiy ehtiyojlari uchun ishlatib yuborgani aniqlangan.

Holat yuzasidan 2019-yil 12-fevral kuni Jinoyat kodeksining 167-moddasi 3-qismi “a” bandi bilan qo‘zg‘atilgan jinoyat ishi yuzasidan Bektemir tuman prokuraturasi tomonidan tergov harakatlari o‘tkazilib, ish ayblov xulosasi bilan sudga yuborilgan.

Ish hujjatlariga ko‘ra, sudlanuvchi M.U. 2017-yilning yanvar oyidan 2019-yil fevral oyiga qadar jami 47 ta holatda sud ijro varaqalari asosida kelib tushgan pul mablag‘larini o‘ziga biriktirilgan va javobgarligida bo‘lgan elektron kalit yordamida ATB InfinBank Sergeli filiali va ATIB “Ipoteka bank” Yashnobod filialining “E-bank” tizimiga ulanib, elektron to‘lov topshiriqnomalariga sud ijro hujjatlari asosida soxta ma’lumotlar kiritish yo‘li bilan turli fuqarolarning nomiga rasmiylashtirilgan bank plastik kartalari hisobiga o‘tkazib, ijro ishlari bo‘yicha qarzdorlar tomonidan to‘langan pullarni o‘zlashtirish yo‘li bilan talon-toroj qilgan.

Shunday yo‘l bilan u ijro ishlari bo‘yicha qarzdorlar tomonidan to‘langan 596,7 million so‘mni o‘zlashtirgan.

Bektemir tuman sudining 2019-yil 5-iyuldagi hukmiga ko‘ra, M.U. Jinoyat kodeksining 167-moddasi 3-qismi “a, g” bandlari (o‘zlashtirish yoki rastrata yo‘li bilan juda ko‘p miqdorda talon-toroj qilish kompyuter texnikasi vositalaridan foydalanib sodir etilgan bo‘lsa) va 209-moddasi 2-qismi “a” bandi (takroran yoki xavfli retsidivist tomonidan mansab soxtakorligi) bilan aybdor deb topilib, unga 2 yil muddatga muayyan huquqdan mahrum qilingan holda 2 yil muddatga axloq tuzatish ishlari jazosi tayinlangan.

Jinoyat oqibatida yetkazilgan 596,7 million so‘m moddiy zarar to‘liq qoplangan.