Ўзбекистонда бешта вазирлик 61 млрд сўмни талон-торож қилишининг олди олинди

Коррупцияга қарши курашиш агентлиги май—июнь ойларидаги давлат харидлари бўйича масофавий мониторинг натижаларини маълум қилди.

Унга кўра, бюджет буюртмачилари томонидан қиймати 101,5 миллиард сўмлик 324 та танловда «Давлат харидлари тўғрисида»ги ва «Рақобат тўғрисида»ги қонунларнинг талаблари бузилишига йўл қўйилганлиги аниқланди.

Қонунчилик талаблари бузилган танловлардан 72 таси (24,6 миллиард сўм) туман (шаҳар) ҳокимликлари, 71 таси (20,9 миллиард) Халқ таълими вазирлиги, 61 таси (17,9 миллиард) Соғлиқни сақлаш вазирлиги, 33 таси (11,1 миллиард) Мактабгача таълим вазирлиги, 24 таси (7,9 миллиард) Олий ва ўрта махсус таълим вазирлиги, 9 таси (3,6 миллиард) Сув хўжалиги вазирлиги ва қолган 54 таси (15,5 миллиард) бошқа вазирлик ва идоралар ҳисобига тўғри келади.

Вилоятлар кесимида Андижонда 20,0 миллиард сўмлик (51 та), Самарқандда 12,8 миллиард сўмлик (52 та), Жиззахда 8,3 миллиард сўмлик (20 та), Бухорода 7,3 миллиард сўмлик (33 та), Қашқадарёда 7,2 миллиард сўмлик (20 та), Сурхондарёда 7,9 миллиард сўмлик (30 та), Хоразмда 5,3 миллиард сўмлик (18 та), Навоийда 5,2 миллиард сўмлик (16 та), Наманганда 2,6 миллиард сўмлик (11 та), Фарғонада 2,0 миллиард сўмлик (10 та), Қорақалпоғистон Республикасида 3,4 миллиард сўмлик (11 та) ва Тошкент шаҳрида 19,5 миллиард сўмлик (51 та) танловлар бўйича давлат харидларига оид қонунчилик талаблари бузилганлиги маълум бўлди.

Мониторинг якунлари бўйича бюджет буюртмачилари томонидан эълон қилинган 101,5 миллиард сўмлик 324 та танловни бекор қилиш ҳақида вазирлик ва идораларга 268 та тақдимнома киритилди.

Бундан аввал Ўзбекистонда 2 йил ичида 120 минг гектардан ортиқ ер ҳокимлар томонидан мақсадсиз берилган ёки талон-торож қилингани, Қашқадарёдаги боғчаларда 2021 йилнинг дастлабки 4 ойида 400 миллион сўмдан ортиқ маблағ талон-торож қилингани ҳамда Тошкентда МИБ ходими икки йилда 596 миллион сўмни ўзлаштириб юборгани маълум бўлгани ҳақида хабар берилганди.