Joriy yil 26-aprel kuni tongga yaqin Namangan viloyatining To‘raqo‘rg‘on tumanidagi “Baxt” mahallasida bosqinchilik jinoyati sodir etildi. Bu haqda “Daryo” muxbiri Azizbek Abduvaliyev xabar bermoqda.
Ushbu mahalla fuqarosi A.A.ning yashash uyiga yuzini niqob bilan to‘sgan noma’lum kimsalar kirib, xonadon egasini taxta bo‘lagi va qo‘llari bilan ayovsiz urib, do‘pposlashadi, so‘ng unga tegishli Note 7 rusumli qo‘l telefonini olib, g‘oyib bo‘lishadi.
Tuman ichki ishlar bo‘limining tezkor guruhi voqea joyiga borganida shubhali holatga duch keldi: qo‘l telefonidan tashqari ko‘zga ko‘rinarli joyda 500 ming so‘m ham turgan, biroq pulga tegilmagan.
Bu savolga javob topish unchalik qiyin bo‘lmadi. Shu hududda joylashgan 54-umumta’lim maktabi tevaragiga qo‘yilgan videokuzatuv vositasi yordamida Damas avtomobili voqea ro‘y bergan vaqt oralig‘ida ikki marta mazkur yo‘ldan o‘tgani aniqlandi.
Haydovchi so‘roq qilinganida haqiqatan ham ikki kishini shu mahallaga tashlab ketgani, bir soatlardan so‘ng qaytib olib ketishga kelishilgani, aytilgan vaqtda kelgani, biroq ular chiqishmagani, mijozlarni kuta-kuta ortga qaytganini aytib berdi.
“Jinoyatchilar tezda topildi. Qizig‘i, ikki yigitni ham shu xonadon bekasining o‘zi yollagan ekan. Turmush o‘rtog‘ining boshqa ayol bilan aloqalari borligidan shubha qilib, rashk tufayli alamidan chiqmoqchi bo‘lgan. Bu niyatini gumonlanuvchilarning biri — jiyani orqali amalga oshirmoqchi bo‘lgan. Xizmat evaziga yigitga boshdan-oyoq kiyim olib bergan”,—deydi To‘raqo‘rg‘on tumani IIB katta tergovchisi, katta leytenant Akmaljon Hakimov.
Hozirda mazkur holat yuzasidan jinoyat ishi qo‘zg‘atilib, tergov-surishtiruv ishlari olib borilmoqda.
Izoh (0)