Ўзбекистонда аҳолининг жисмоний тайёргарлик ҳолати баҳоланади

Ўзбекистонда 2021 йил 1 августдан аҳолининг жисмоний тайёргарлик даражасини баҳолаш тизими жорий этилади. Бу ҳақда 16 июнь куни имзоланган «Аҳолининг жисмоний тайёргарлик даражасини баҳолаш тизимини жорий этишнинг ташкилий чора-тадбирлари тўғрисида»ги Президент қарорида кўзда тутилган.

Бундан аҳолининг барча қатламлари ўртасида жисмоний тарбия ва спортни оммалаштириш орқали жисмоний қобилият ва ҳаракат фаоллигини такомиллаштириш ҳамда зарарли одатлар ва турли касалликларнинг олдини олиш, шунингдек, соғлом турмуш тарзи кўникмаларини шакллантириш ва жисмоний тайёргарлик даражасини ошириш мақсад қилинган.

Ҳужжатга кўра, баҳолаш тизими бўйича спорт синовлари махсус ва ихтиёрий равишда аҳолининг 7 ёшдан 70 ёшгача бўлган қатлами ва ундан катталарнинг жисмоний тайёргарлигини аниқлайди. Спорт синовлари ҳар йили бир маротаба ўтказилади. Бунда, спорт синовлари иштирокчиларига 11 та ёш тоифаси бўйича эгаллаган ўрни ва даражасига қараб спорт разрядлари ва унвонлари берилади.

Шунингдек, спорт синовларининг махсус талабларини муваффақиятли бажарганларга бир йил давомида қуйидаги имтиёзлар берилади:

• сафарбарлик чақируви резервидаги ҳарбий хизмат тўловининг 50 фоизини тўлаш ва муддатли ҳарбий хизматга юборишда устунлик;
• 1 ўрин эгаларига «Темурбеклар мактаби»га синовларсиз кириш;
• бепул тарзда кўп тармоқли тиббиёт муассасасида кўрикдан ўтиш;
• умумий фойдаланишдаги транспортда бепул ҳамда ҳудудлараро ҳаракатланишда 50 фоизлик чегирма бериш;
• совриндорларнинг фарзандларини умумтаълим мактаби, мактабгача таълим ташкилотлари ва ёзги соғломлаштириш оромгоҳларига навбатсиз жойлаштириш;
• барча давлат органлари ва ташкилотларининг ходимларига иш жойи ҳисобидан дам олиш масканлари ва санаторийларга бепул йўлланмалар тақдим этиш;
• ишга ёки ўқишга киришда жисмоний тайёргарлик талаб этиладиган имтиҳон, синов, амалий машғулотларида устунлик бериш.

2021 йил 1 августгача спорт синовларининг платформаси (www.jtdss.uz) ва ягона электрон базаси фаолияти йўлга қўйилади.