Ichki ishlar vazirligi “Ichki ishlar organlari tayanch punktlari profilaktika (katta) inspektorlarining aholi orasida sog‘lom turmush tarzini targ‘ib qilish borasidagi faoliyatini amalga oshirish tartibi to‘g‘risidagi nizomni tasdiqlash haqida”gi Vazirlar Mahkamasi qarori loyihasini muhokamaga qo‘ydi.

Foto: Buxoro viloyati hokimligi

Unga ko‘ra, Ichki ishlar organlari tayanch punktlari profilaktika (katta) inspektorlari aholi orasida sog‘lom turmush tarzini targ‘ib qilishda oilaviy shifokorlarga ko‘maklashadi.

Profilaktika inspektorlari mahallalarda sog‘lom turmush tarzini targ‘ib qilishda oilaviy shifokorlarga quyidagi yo‘nalishlarda ko‘maklashadi:

  • aholi o‘rtasida ortiqcha vazn, semizlik va yuqumli bo‘lmagan kasallikka chalingan shaxslarga sog‘lom turmush tarzi bo‘yicha zarur tavsiyalar berishda;
  • aholi ko‘p to‘planadigan joylar, istirohat bog‘lari, mahalla guzari, idora-tashkilotlar va o‘quv muassasalarida “Salomatlik maydoncha”lari tashkil etishda;
  • mahallaning faol, ibratli, ziyoli oilalari vakillari hamda ko‘ngilli yoshlardan tuzilgan “Salomatlik maktab”lari tomonidan sog‘lom ovqatlanish asoslari va jismoniy faollik bo‘yicha seminar-treninglar o‘tkazishda;
  • “Salomatlik maktabi” a’zolari tomonidan oila va xonadonlarda amaliy targ‘ibot tadbirlarini tashkillashtirish orqali aholi orasida sog‘lom turmush tarzi va jismoniy faollikni targ‘ib etishda;
  • mahallada istiqomat qiladigan jismoniy tarbiya bilan shug‘ullanishga ishtiyoqi bor, xohish bildirgan ayollardan iborat “E’zozli ayollar” va erkaklar uchun “Faxriy nuroniy” klublarini tuzish hamda klub a’zolarini jismoniy tarbiya mashqlarini bajarish qoidalariga o‘rgatish, mahallada jismoniy faollikni amalga oshirish uchun sharoit yaratish va ular orqali mahalla aholisini ertalabki badantarbiya va kechki sayrga jalb qilishda;
  • mahallalarda “Sog‘lom xonadon”, “Sportchi oila”, “Sportchi bobo va nabira” kabi tanlovlar va chellendjlar o‘tkazishda;
  • aholi, ayniqsa, xotin-qizlarni mahalalarda mavjud sport inshootlaridagi sport to‘garaklari va seksiyalarga jalb etishda.

Profilaktika inspektorlari mahalla faollariga fuqarolarning kechki sayrlarini tashkil qilish, sport o‘yinlarini xavfsiz o‘tkazishga ko‘maklashish borasida:

  • mahalla fuqarolar yig‘ini raisi bilan sport o‘yinlarini o‘tkazish tartibini bevosita fuqarolar yig‘ini qarori bilan tasdiqlab olish;
  • sport o‘yinlarini tashkil etish bo‘yicha jismoniy va yuridik shaxslarning murojaatlarini ko‘rib chiqish va uni tasdiqlash uchun fuqarolar yig‘ini kengashiga taqdim etish kabi masalalarni hal qiladi.

Mahallalarda sog‘lom turmush tarzini targ‘ib qilishda bu borada davlat organlari va oilaviy shifokorlarga ko‘maklashishda, tadbirlar vaqtida xavfsizlikni ta’minlashda, jamoat tartibini saqlashda o‘rnak ko‘rsatgan profilaktika inspektorlari mahallasidagi aholining salomatlik ko‘rsatkichlariga ko‘ra har 6 oyda bir marta qonun hujjatlarida belgilangan tartibda rag‘batlantiriladi.