Jahon banki Ijrochi direktorlar kengashi mamlakatimiz uchun ahamiyatli bo‘lgan O‘zbekiston soliq ma’muriyatchiligini isloh qilish loyihasini ma’qulladi, deya xabar bermoqda Davlat soliq qo‘mitasi matbuot xizmati.
Ta’kidlanishicha, xalqaro ekspertlar bilan uzoq muddatli va samarali hamkorlik Davlat soliq xizmati organlariga kasbiy salohiyatini, xususan, raqamli transformatsiyani isbotlash imkonini bergan.
Qayd etilishicha, Jahon banki tomonidan ma’qullangan ushbu loyiha uzoq muddatli hamkorlikda soliq sohasi va O‘zbekistonning moliyaviy-iqtisodiy salohiyatini chuqur, professional tahlil qilish jarayonida ishlab chiqilgan.
Loyiha 60 million AQSH dollari miqdoridagi imtiyozli kredit hisobiga amalga oshiriladi. Ushbu mablag‘lar O‘zbekiston hukumatiga juda past foizda, 30 yilgacha bo‘lgan muddatga imtiyozli kredit shaklida taqdim etiladi. Jahon banki guruhining tarkibiga kiruvchi Xalqaro taraqqiyot assotsiatsiyasi shunday qarorga keldi.
Loyiha operatsion samaradorlik va natijadorlik hamda soliq to‘lovchilarga xizmat ko‘rsatish sifatini oshiradi. Unda Davlat soliq qo‘mitasining operatsion, institutsional, texnologik va inson salohiyatini rivojlantirish hamda soliq qonunchiligiga rioya qilishni rag‘batlantirish nazarda tutilgan.
Avvalroq Jahon banki O‘zbekistonga shaharlarni rivojlantirish uchun 100 mln dollar ajratishi, Jahon banki O‘zbekistonga qariyb 300 mln dollarlik imtiyozli kredit va grant ajratishi hamda Yaponiya O‘zbekiston elektr energiyasi sohasi va ijtimoiy-iqtisodiy tiklanishiga hissa qo‘shish maqsadida 195 mln dollar miqdorida kredit ajratgani haqida xabar berilgandi.
Izoh (0)