Metro Plaza kompaniyasi Toshkentdagi gazeta majmuasini (“Gazeta korpusi” nomi bilan mashhur) sotib olish bo‘yicha tenderda g‘olib bo‘ldi. Bu haqda Davlat aktivlarini boshqarish agentligi matbuot xizmati xabar berdi.
Bino poytaxtning Mirobod tumanidagi Buxoro va Nuroniylar ko‘chalari kesishmasida joylashgan. Umumiy yer maydoni 1,2 gektarni, bino va inshootlarning maydoni 19 152 kvadrat metrni tashkil etadi, shundan qurilish uchun 17 863 kvadrat metr ajratilgan.
Davlat aktivlarini boshqarish agentligi ma’lumotlariga ko‘ra, Metro Plaza binoni 78 milliard so‘mga xususiylashtiradi.
Metro Plaza kompaniyasi haqida
“Gazeta.uz”ning Korxona va tashkilotlarning yagona davlat registriga tayanib yozishicha, Metro Plaza MChJ 2021-yil 21-aprelda 20 milliard so‘mlik ustav kapitali bilan ro‘yxatdan o‘tgan. Asosiy faoliyati — biznes va menejment masalalari bo‘yicha konsalting. Kompaniya asoschilari Mirodil Fozilov (50 foiz), Hasan Mamasaidov (25 foiz) va Husan Mamasaidov (25 foiz), rahbari Oyatullo Asqarov.
Aka-uka Mamasaidovlar Office Market (poligrafiya), Dekos (reklama mahsulotlari va biznes sovg‘alarini yetkazib berish va ishlab chiqarishga ixtisoslashgan) kompaniyalariga hamda MFaktor loyihasi (biznes va tadbirkorlik haqidagi YouTube loyihasi)ga asos solgan taniqli tadbirkorlar hisoblanadi.
Mirodil Fozilov ham turar joy binolari qurilishiga ixtisoslashgan Oazis Lux Investments (50 foiz, Oazis mehmonxonasi) va Royal Central Development (100 foiz) kompaniyalarining ulushiga egalik qiladi.
Avvalroq Toshkentda DXXning sobiq binosini 210 milliard so‘mga TIV rahbari o‘g‘liga tegishli kompaniya sotib olgani to‘g‘risida xabar berilgandi.
Eslatib o‘tamiz, “Gazeta korpusi” nomi bilan taniqli bino 2018-yilda 18,2 milliard so‘mlik boshlang‘ich narx bilan kimoshdi savdosiga qo‘yilgan edi. O‘sha yilning aprel oyi oxirida Toshkent shahar hokimi vazifasini bajaruvchi etib tayinlangan Jahongir Ortiqxo‘jayev shahar markazidagi yetti qavatli ma’muriy bino ishtirokidagi kimoshdi savdosini to‘xtatgandi.
Izoh (0)