Janubiy Koreyaning Ikki Koreya davlatini birlashtirish vazirligi 15-iyun kuni KXDRni Koreyalararo aloqa liniyalarini zudlik bilan tiklashga chaqirdi, deb yozadi “Interfaks”.
“Koreyalararo aloqa kanali zudlik bilan hech qanday shartlarsiz tiklanishi kerak. Biz Shimoliy Koreyani ikki davlat o‘rtasidagi aloqa liniyalarini tiklashga chaqiramiz”, — deyiladi ikki Koreyani birlashtirish bo‘yicha vazirlik vakili xabarida.
Vakilning so‘zlariga ko‘ra, “Koreyalararo aloqa kanali eng asosiy aloqa vositasi bo‘lib, ilgari ikki tomon bunday kanalni saqlab qolish to‘g‘risida bir necha bor kelishib olgan”.
2019-yil fevral oyida Xanoyda bo‘lib o‘tgan AQSh—KXDR sammiti kelishuvsiz yakunlangandan so‘ng Shimol muzokaralar va transchegaraviy hamkorlik bo‘yicha takliflarga javob bermay qo‘ygan. O‘shandan buyon ikki Koreya o‘rtasidagi munosabatlar sovuqligicha qolmoqda.
2020-yil 16-iyunda KXDR rasmiylari Seul bilan barcha mavjud aloqa kanallari orqali aloqalarni to‘xtatganini e’lon qildi. Keyinchalik demilitarizatsiya zonasi yaqinidagi Keson texnoparkidagi Koreyalararo aloqalar idorasi portlatilgani ma’lum bo‘ldi. KXDR rasmiylari o‘zlarining qarori bilan bino vayron qilinganini tasdiqlagan.
Avvalroq Kim Chen In Janubiy Koreya musiqa va filmlariga qarshi urush e’lon qilgani haqida xabar berilgandi. Unga ko‘ra, mamlakatda Janubiy Koreya filmlarini tomosha qilgan va musiqalarini tinglaganlar uchun jazo kuchaytiriladigan bo‘ldi.
Izoh (0)