Jons Hopkins universiteti ma’lumotlariga ko‘ra, dunyo bo‘yicha koronavirusni yuqtirib olganlar soni 176 274 200 kishini tashkil qilmoqda. COVID-19 qurbonlari soni esa 3 812 377 kishiga yetdi. Kasallanish holatlarining ko‘pligi bo‘yicha jahonda AQSh (33,4 million), Hindiston (29,5 million), Braziliya (17,4 million), Fransiya (5,8 million) va Turkiya (5,3 million) yetakchilik qilmoqda.
Qirg‘izistonda koronavirusning uchinchi to‘lqini yuz bermoqda
Qirg‘iziston sog‘liqni saqlash vaziri o‘rinbosari Jaloliddin Rahmatullayev mamlakatda koronavirus infeksiyasining uchinchi to‘lqini yuz berayotganini ma’lum qildi.“Pandemiya boshidan buyon koronavirus infeksiyasining epidemiologik ko‘tarilishi ikki marta kuzatildi: 2020-yil iyulida va noyabrida. Bugungi kunda kasallikning uchinchi to‘lqini kuzatilmoqda, u 2021-yil aprelda boshlangan”, — dedi u.
Mansabdorning so‘zlariga ko‘ra, Respublika Sog‘liqni saqlash vazirligi COVID-19 yana avj olishiga tayyor turibdi: “qizil” zonalarda ishlash uchun kadrlar zaxirasi yaratilgan, shuningdek, COVID-bemorlar uchun qo‘shimcha o‘rinlar yaratilgan.
Eron o‘zining koronavirusga qarshi vaksinasini ma’qulladi
Eron hukumati mamlakatda ishlab chiqarilgan koronavirus infeksiyasiga qarshi birinchi vaksina — COVIran Barekat vaksinasidan favqulodda foydalanishga ruxsat berdi.Eronning Shifafarmed farmatsevtika kompaniyasi tomonidan ishlab chiqilgan ushbu vaksinaning asosini faolsizlantirilgan (o‘ldirilgan) virus tashkil qiladi. Vaksinaning xavfsizligi va samaradorligi bo‘yicha ilk tadqiqotlar 2020-yilning dekabrida boshlangan edi.
Ta’kidlanishicha, COVID-vaksinalar importi bilan bog‘liq muammolar tufayli mamlakat o‘z vaksinasini ishlab chiqishga qaror qilgan. Eronda ommaviy vaksinatsiya boshlashga Amerika sanksiyalari xalal bergan.
AP yozishicha, Eron Yaqin Sharqda pandemiyadan eng ko‘p zarar ko‘rgan davlat hisoblanadi.
Pokistonda emlanishdan bosh tortganlar mobil aloqadan uzib qo‘yilishi mumkin
Pokistondagi viloyatlar hukumatlari koronavirusga qarshi emlanishdan bosh tortganlik uchun jazo sifatida mobil aloqadan uzib qo‘yish chorasini qo‘llashini e’lon qildi.Dastlab ushbu chora taklif sifatida ilgari surilgan. Ammo odamlar vaksina olishga jur’at qilavermaganidan keyin amalda qo‘llashga qaror qilingan.
Emlanishdan bosh tortgan davlat ishchilariga iyuldan maosh to‘lanmay qo‘yiladi. Mobil aloqadan uzib qo‘yish bilan Pokiston Davlat aloqa agentligi shug‘ullanadi.
Pokiston Yosh shifokorlar uyushmasi rahbari Salmon Hasibning aniqlik kiritishicha, odamlar vaksinalar haqida mish-mishlar va yolg‘on xabarlar tarqatmoqda. Ular orasida eng ko‘p tarqalgani vaksinatsiyaning ikki yil ichida bepushtlik yoki o‘limga olib kelishi haqidagi mish-mishdir.
Ayni vaqtda emlangan pokistonliklarga kinoteatr, bazmxonalar va ziyoratgohlarga tashrif buyurish uchun ruxsat beriladi. Xodimlarining 20 foizdan ortig‘i emlangan korxonalar uchun esa ularning faoliyati bilan bog‘liq cheklovlar bekor qilinadi.
Mavzuga doir: Pokiston “Sputnik V” vaksinasini ro‘yxatdan o‘tkazdi
- “Rospotrebnadzor” COVID-19’ga qarshi emlanishdan oldin yoki keyin allergiyaga qarshi dorilar ichish tavsiya etilmasligini, ular immun javobiga salbiy ta’sir ko‘rsatishi mumkinligini ma’lum qildi. Vaksina olishga organizmni tayyorlash maqsadida antigistamin vositalar qabul qilish kerak emas, chunki ular vaksina berishi mumkin bo‘lgan reaksiyani kamaytirishga, tana harorati oshishi va ukol joyida og‘riqlar paydo bo‘lishiga olib kelishi mumkin.
- Isroil Sog‘liqni saqlash vazirligi bino ichida niqob taqish majburiyatini bekor qildi. Bu 15-iyundan kuchga kirdi. Faqatgina aviareyslar yo‘lovchilari niqob taqishi kerak bo‘ladi, shuningdek, ba’zi tibbiy muassasalarda ham bu qoida kuchda qoladi.
- Koronavirusning Delta deb nom berilgan shtammi (“hindcha” shtamm) allaqachon 74 ta davlatga tarqalishga ulgurgan. U tezkorlik bilan tarqalishda davom etmoqda va butun dunyoda yetakchi shtammga aylanishi xavfi bor.
Izoh (0)