Namangan viloyati hokimi Shavkat Abdurazzoqov boshchiligidagi delegatsiyaning Qirg‘izistonning Jalolobod viloyatiga safari davomida o‘ndan ortiq kelishuv va bitimlar imzolandi. Bu haqda “Daryo” muxbiri Azizbek Abduvaliyev xabar bermoqda.
Safarning asosiy tadbirlaridan sanalgan “Jalolobod— Namangan” biznes forumi samarali o‘tdi.
Unda har ikki viloyat rahbarlari, ularning o‘rinbosarlari, chegaradosh tuman hokimlari, tadbirkorlar va ishbilarmonlar ishtirok etdi.
Biznes forumda Namangan viloyati hokimi Shavkat Abdurazzoqov va Qirg‘iziston hukumatining Jalolobod viloyatidagi vakolatli vakili Abdusattor Sirg‘aboyev so‘z olib, ikki davlat tadbirkorlarini faol hamkorlikka chaqirdi.
Biznes forum Jalolobod va Namangan viloyatlari tadbirkorlari ishtirokidagi yuzma-yuz muloqot va muzokaralar bilan davom etdi. Ikki tomon ishbilarmonlari o‘rtasida qator shartnomalar imzolandi.
“Mart oyi oxirida jalolobodlik hamkorlarimiz korxonamizga kelib, hamkorlik qilish istagini bildirishgandi. O‘zaro muzokaralarimizning amaliy natijasi sifatida Jalolobod shahrida qiymati 25 million dollarga teng bo‘lgan, 450 kishining bandligi ta’minlanadigan, paxtadan ip va ipdan momiq sochiq ishlab chiqarishga ixtisoslashgan fabrika quramiz. Hamkorlikdagi ushbu loyihamizni 2022-yilning uchinchi choragida ishga tushirishni rejalashtirganmiz”, — deydi Namangandagi Art Soft Holding kompaniyasi rahbari G‘iyosiddin Boboxonov.
Ma’lumot uchun, biznes forum yakunida ushbu kelishuvdan tashqari qishloq xo‘jaligi, sanoat, tekstil, logistika va turizmni rivojlantirishga qaratilgan jami qiymati 24 million dollarlik 12 ta investitsiyaviy va eksport-import shartnomalari imzolandi.
Izoh (0)