Наманган вилояти ҳокимининг Қирғизистонга сафари давомида икки томон ўртасида ўндан ортиқ шартномалар имзоланди

Наманган вилояти ҳокими Шавкат Абдураззоқов бошчилигидаги делегациянинг Қирғизистоннинг Жалолобод вилоятига сафари давомида ўндан ортиқ келишув ва битимлар имзоланди. Бу ҳақда «Дарё» мухбири Азизбек Абдувалиев хабар бермоқда.

Сафарнинг асосий тадбирларидан саналган «Жалолобод— Наманган» бизнес форуми самарали ўтди.

Унда ҳар икки вилоят раҳбарлари, уларнинг ўринбосарлари, чегарадош туман ҳокимлари, тадбиркорлар ва ишбилармонлар иштирок этди.

Бизнес форумда Наманган вилояти ҳокими Шавкат Абдураззоқов ва Қирғизистон ҳукуматининг Жалолобод вилоятидаги ваколатли вакили Абдусаттор Сирғабоев сўз олиб, икки давлат тадбиркорларини фаол ҳамкорликка чақирди.

Бизнес форум Жалолобод ва Наманган вилоятлари тадбиркорлари иштирокидаги юзма-юз мулоқот ва музокаралар билан давом этди. Икки томон ишбилармонлари ўртасида қатор шартномалар имзоланди.

«Март ойи охирида жалолободлик ҳамкорларимиз корхонамизга келиб, ҳамкорлик қилиш истагини билдиришганди. Ўзаро музокараларимизнинг амалий натижаси сифатида Жалолобод шаҳрида қиймати 25 миллион долларга тенг бўлган, 450 кишининг бандлиги таъминланадиган, пахтадан ип ва ипдан момиқ сочиқ ишлаб чиқаришга ихтисослашган фабрика қурамиз. Ҳамкорликдаги ушбу лойиҳамизни 2022 йилнинг учинчи чорагида ишга туширишни режалаштирганмиз», — дейди Намангандаги Art Soft Holding компанияси раҳбари Ғиёсиддин Бобохонов.

Маълумот учун, бизнес форум якунида ушбу келишувдан ташқари қишлоқ хўжалиги, саноат, текстиль, логистика ва туризмни ривожлантиришга қаратилган жами қиймати 24 миллион долларлик 12 та инвестициявий ва экспорт-импорт шартномалари имзоланди.