Farg‘onada YPX xodimiga bo‘ysunmay, uni haqoratlab, qo‘l ko‘targan haydovchiga nisbatan sud tomonidan ma’muriy qamoq jazosi belgilandi, deb xabar bermoqda YHXBB matbuot xizmati.
Ma’lum qilinishicha, boshqaruv vaqtida qo‘l telefonidan foydalanib kelgan haydovchini YPX xodimi to‘xtatgan va qoida buzilganini tushuntirib, bayonnoma tuzilishini aytgan. Tekshiruv vaqtida haydovchining o‘z vaqtida to‘lanmagan qarzdorligi borligi ham aniqlangan. Shu sababli transport vositasi jarima maydoniga olib borilishi aytilgan.
Shundan so‘ng haydovchi YPXning qonuniy talablariga bo‘ysunmay, faol qarshilik ko‘rsatgan.
Rasmiylashtirilgan hujjatlar sud tomonidan o‘rganilib, haydovchiga nisbatan Ma’muriy javobgarlik to‘g‘risidagi kodeksning 183-moddasi (mayda bezorilik) hamda 194-moddasi (ichki ishlar organlari xodimining qonuniy talablarini bajarmaslik) 1-qismi tartibida 10 sutka ma’muriy qamoq jazosi belgilangan.
Avvalroq Toshkentda YPX xodimiga bo‘ysunmay, “bor yo‘qol” deb yo‘lida davom etgan haydovchining Equinox’i jarima maydonchasiga joylashtirilgani haqida xabar berilgan edi.
Undan avval esa Jizzaxda haydovchini so‘kkan YPX xodimi ishdan olingani, Samarqandda haydovchiga xizmat guvohnomasini taqdim etishni istamagan YPX xodimiga xizmat tekshiruvi tayinlangani, Qoraqalpog‘istonda haydovchiga qo‘l ko‘targan YPX xodimiga nisbatan xizmat tekshiruvi o‘tkazilayotgani xabar qilingandi.
Izoh (0)