Samarqandda haydovchiga xizmat guvohnomasini taqdim etishni istamagan YPX xodimiga xizmat tekshiruvi tayinlandi

IIV YHXBB axborot xizmati ijtimoiy tarmoqda YPX inspektori va fuqaro o‘rtasidagi tortishuv aks etgan videoga izoh berdi.

Ijtimoiy tarmoqlarda xizmat guvohnomasini taqdim etishni istamagan YPX inspektori va haydovchi o‘rtasida sodir bo‘lgan tortishuv videosi tarqaldi. Videodan ko‘rish mumkinki, avtomobil haydovchisi o‘z hujjatlarini inspektorga taqdim etishni istamagan. O‘z navbatida, YPX xodimi ham haydovchining xizmat guvohnomasini ko‘rsatish borasidagi talabini bajarmagan.

Ma’lum qilinishicha, YPX inspektori O.Ortiqov M-39 avtomobil yo‘lining “Omonqo‘ton” YPX maskanida xizmat olib borayotgan vaqtida Lada Vesta rusumli transport vositasi haydovchisi quvib o‘tish qoidalarini buzgani uchun to‘xtatilgan. Haydovchidan hujjatlarini taqdim qilishi so‘ralganida u YPX inspektoriga hujjatlarni taqdim qilmagan.

Xodim va haydovchi o‘rtasidagi to‘liq muloqot inspektorning bodi-kamerasida qayd etilgan.

“YPX xodimi va haydovchi o‘rtasidagi muloqot yuzasidan Samarqand viloyati IIB YHXB tomonidan xizmat tekshiruvi tayinlangan”, — deyiladi xabarda.