Toshkentda 16-iyundan boshlab chiqindilarni saralab yig‘ish uchun rangli paketlarni tarqatish boshlanadi. Maxsus yorliq yopishtirilgan mashinalar 2021-yil 1-iyuldan boshlab yangi jadval bo‘yicha ishlashni boshlaydi. Bu haqda poytaxt hokimligiga tayanib, “Podrobno” xabar berdi.
Loyihani 2021-yildan boshlab uch yil davomida joriy etish rejalashtirilmoqda.
Qattiq maishiy chiqindilarni saralab yig‘ish tizimi quyidagi tartibda bosqichma-bosqich amalga oshiriladi:
- birinchi bosqichda (2021-yil) — Toshkent hokimligi tomonidan ro‘yxati tuzilgan 24 ta mahalla hududida (har bir tumanda ikkitadan) chiqindilarni “qayta ishlanuvchi”, “qayta ishlanmaydigan” va “organik” toifalarga bo‘lingan holda yig‘ish;
- ikkinchi bosqichda (2022-yil) — “Maxsustrans” davlat unitar korxonasi xizmat ko‘rsatuvchi barcha turdagi individual turar joy sektorlari hududida qattiq maishiy chiqindilarni “qayta ishlanuvchi”, “qayta ishlanmaydigan” va “organik” toifalarga bo‘lingan holda yig‘ish;
- uchinchi bosqichda (2023-yil) — barcha tumanlarda chiqindilarni “qayta ishlanuvchi”, “qayta ishlanmaydigan”, “organik”, “xavfli maishiy chiqindilar” va boshqa toifalarga bo‘lgan holda yig‘ish.
Eslatib o‘tamiz, 2019-yilda Toshkent shahridagi maishiy chiqindilar tashlanadigan Ohangaron tumanidagi poligon 98 foizga to‘lgani ma’lum qilingandi. Senator Bahodir To‘ychiyev O‘zbekistonda 2028-yilgacha chiqindilarni to‘plash va olib chiqib ketish xizmatini barcha hududlarda 100 foizga yetkazish rejalashtirilganini aytgandi.
Izoh (0)