Hukumatning 12-iyundagi qarori bilan O‘zbekiston Tibbiy-ijtimoiy xizmatlarni rivojlantirish agentligi to‘g‘risidagi nizom tasdiqlandi, deb xabar bermoqda Adliya vazirligi matbuot xizmati.
Nizomga ko‘ra, Tibbiy-ijtimoiy xizmatlarni rivojlantirish agentligining asosiy vazifalari, funksiyalari, huquqlari va javobgarligini, shuningdek, faoliyatini tashkil etish tartibi belgilandi.
Agentlikning asosiy vazifalaridan biri etib, jumladan, keksalar, nogironligi bo‘lgan shaxslar va aholining ijtimoiy himoyaga muhtoj boshqa toifalariga tibbiy-ijtimoiy xizmat ko‘rsatish sohasida yagona davlat siyosatini amalga oshirish belgilandi.
Agentlikka Prezident bilan kelishgan holda Vazirlar Mahkamasi tomonidan lavozimga tayinlanadigan va lavozimdan ozod etiladigan direktor rahbarlik qiladi.
Shuningdek, agentlik tarkibida yuridik shaxs hisoblanmaydigan, Nogironligi bo‘lgan shaxslarni qo‘llab-quvvatlash jamg‘armasi hamda budjetdan tashqari “Muruvvat” va “Saxovat” internat uylarini qo‘llab-quvvatlash jamg‘armasi faoliyat yuritadi.
Agentlik o‘z faoliyatida Vazirlar Mahkamasiga bo‘ysunadi va hisobot beradi.
Eslatib o‘tamiz, Prezidentning 2021-yil 25-martdagi “Keksa va nogironligi bo‘lgan shaxslarni ijtimoiy qo‘llab-quvvatlash, ‘Saxovat’ va ‘Muruvvat’ internat uylari tizimini yanada rivojlantirish to‘g‘risida”gi farmoniga asosan Sog‘liqni saqlash vazirligi huzuridagi Tibbiy-ijtimoiy xizmatlar agentligi va uning hududiy bo‘linmalari negizida Tibbiy-ijtimoiy xizmatlarni rivojlantirish agentligi va uning hududiy bo‘linmalarini tashkil etish belgilangandi.
O‘zbekiston hukumatining 13-apreldagi qarori bilan Tibbiy-ijtimoiy xizmatlarni rivojlantirish agentligi rahbariyati tayinlandi.
Izoh (0)