Saudiya Arabistoni koronavirus tarqalishi xavfi tufayli 2021-yilda ham Haj safari uchun chet ellik ziyoratchilarni qabul qilmasligi, faqat qirollikda istiqomat qiluvchi ko‘pi bilan 60 ming kishiga haj ziyoratini amalga oshirish uchun ruxsat berishi haqida xabar berilgan edi. O‘zbekistonning Din ishlari bo‘yicha qo‘mitasi Saudiya Arabistoni hukumatining ushbu qarori yuzasidan bayonot berdi.
O‘zbekistonning Jidda shahridagi Bosh konsulxonasi Haj va umra masalalari bo‘yicha attashesi tomonidan Vazirlar Mahkamasi huzuridagi Din ishlari bo‘yicha qo‘mitaga taqdim etilgan rasmiy ma’lumotga ko‘ra, 2021-yilning 13-iyunida Saudiya Arabistoni Podshohligi Sog‘liqni saqlash vazirligi, Ichki ishlar vazirligi hamda Haj va umra vazirliklari tomonidan OAV vakillari ishtirokida matbuot anjumani tashkil etilgan.
Unda “Haj-2021” mavsumini tashkil etish masalalari haqida to‘liq axborot berilgan. Jumladan, jahonda kuzatilayotgan murakkab epidemiologik vaziyat hamda hojilarning sog‘lig‘ini himoya qilishni ta’minlash maqsadida “Chet el fuqarolari uchun Haj ziyoratini cheklash, mahalliy aholi va mamlakatda doimiy yashovchi rezidentlar uchun Haj tadbirini o‘tkazish to‘g‘risida” hukumat qarori qabul qilingani e’lon qilingan.
Shuningdek, rasmiy xatda hojilarning xavfsizligi va salomatligini ta’minlash maqsadida 2021-yilgi haj tadbiri — Saudiya Arabistoni Podshohligi aholisi va ushbu mamlakatda muqim yashab kelayotgan 18 dan 65 yoshgacha bo‘lgan, eng asosiysi, COVID-19’ga qarshi emlangan fuqarolar (rezidentlar) uchun tashkil etilishi ko‘rsatib o‘tilgan.
Saudiya hukumatining ushbu qarori JSST, Saudiya ulamolari Kengashi, Islom hamkorlik tashkiloti, islom mamlakatlaridagi ko‘plab fatvo hay’atlari va boshqa ilmiy markazlar tomonidan ma’qullangan.
Yuqoridagilarga asoslangan holda, O‘zbekiston Vazirlar Mahkamasi huzuridagi Din ishlari bo‘yicha qo‘mita, O‘zbekiston musulmonlari idorasi, Haj va Umra tadbirlarini tashkil etish va o‘tkazish masalalari bo‘yicha Jamoatchilik kengashi ham Saudiya Arabistoni hukumatining hojilar manfaatlari, ularning hayoti va sog‘lig‘ini himoya qilishni ta’minlash nuqtayi nazaridan qabul qilgan ushbu qarorini qo‘llab-quvvatlagan.
Qo‘mita bayonotida aytilishicha, haj safariga borishni rejalashtirgan fuqarolarning navbatlari keyingi mavsum uchun saqlab qolinadi.
Ma’lumot uchun, hozirgi vaqtda Saudiya Arabistoni Podshohligida murakkab epidemiologik vaziyat saqlanib qolmoqda. Har kuni o‘rtacha 1 000 dan ortiq virus bilan kasallanish, 15-20 ta o‘lim holati kuzatilmoqda.
Eslatib o‘tamiz, mart oyida ijtimoiy tarmoqlarda 2021-yilgi Haj mavsumiga ruxsat berilgani, buning uchun ziyoratchilar emlangan bo‘lishi kerakligi to‘g‘risida xabarlar tarqalgandi. Ushbu masalada Din ishlari bo‘yicha qo‘mita murojaat bilan chiqib, Haj va Umra tadbirlarini tashkil etish bo‘yicha Saudiya Arabistoni hukumati tomonidan hozirga qadar hech qanday rasmiy qaror e’lon qilinmaganini ma’lum qilgandi.
Iyun oyining boshlarida ham Saudiya Arabistoni hukumati ayrim talablar asosida insonlarga Haj safari uchun ruxsat berishga qaror qilgani to‘g‘risida xabarlar tarqaldi. O‘zbekiston musulmonlari idorasi hali yakuniy qaror qabul qilinmaganini bildirgandi.
Izoh (0)