Сергели тумани ҳудудида кузатилаётган бадбўй ҳид юзасидан 22 нафар масъулга маъмурий иш қўзғатилди

Тошкент шаҳрининг Сергели тумани «Ўзгариш» маҳалласида истиқомат қилувчи аҳоли узлуксиз ёқимсиз ҳид келаётганидан шикоят қилганди. Экологик партия сув тозалаш иншооти ва унинг атрофидаги корхоналар томонидан атроф табиий муҳитга етказилаётган зарар атрофлича ўрганиб чиқилиши ҳамда бундай салбий ҳолатларни бартараф этиш бўйича тегишли чоралар кўрилиши лозимлигини таъкидлаганди.

Экология ва атроф-муҳитни муҳофаза қилиш давлат қўмитаси Тошкент шаҳар бошқармаси бошлиғи ўринбосари Фарҳод Деҳқонов Сергели тумани ҳудудида кузатилаётган бадбўй ҳид юзасидан 22 нафар масъулга маъмурий иш қўзғатилганини маълум қилди.

Унинг сўзларига кўра, Сергели тумани ҳудудида баъзи пайтлари кузатилаётган бадбўй ҳидни бартараф қилиш мақсадида «Тошкент шаҳар сув таъминот» МЧЖ тақдим қилган потенциал хавфли корхоналар рўйхати бўйича Бектемир ва Салор оқова сув тозалаш иншоотларига техник сувларни ташловчи корхоналарда Президент ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича бизнес-омбудсман рухсатига асосан текширувлар амалга оширилди.

Текшириш натижаларига кўра, корхона ва ташкилотларнинг 22 нафар масъулига нисбатан Маъмурий жавобгарлик тўғрисидаги кодекснинг тегишли моддалари билан маъмурий ишлар қўзғатилди. Аниқланган камчиликларни бартараф этиш, корхоналарда локал оқова тозалаш тизимини ишга тушириш, уларни таъмирлаш ва самарали ишлашини таъминлаш юзасидан қисқа муддатда бажарилиши лозим бўлган мажбурий кўрсатмалар берилди.

Фарҳод Деҳқонов, шунингдек, Бектемир туманида жойлашган 9 та корхона томонидан берилган мажбурий кўрсатмалар ўз вақтида бажарилмаганлиги сабабли давлат экологик экспертизасининг белгиланган муддатдан олдин амал қилишини тўхтатиш ва шаҳар канализация тармоғидан узиш мақсадида Тошкент шаҳар иқтисодий судига даъво аризаси киритилганини маълум қилган.

Салор оқова сув тозалаш иншоотига ишлаб чиқариш оқова сувларини ташловчи 18 та корхонадан 11 тасида текширишлар амалга оширилган. Меъёр даражасида тозаланмаган оқова ташлаётган корхоналар фаолияти вақтинча тўхтатилган.

Эслатиб ўтамиз, Олий Мажлис Сенати матбуот хизмат чиқинди сувларни ифлослантирадиган бир қатор корхоналарни тозалаш иншоотларини реконструкция қилиш тўғрисида ҳукумат қарори лойиҳаси тайёрланаётганини маълум қилганди.