Самарқанд вилояти Каттақўрғон туманида ЙПХ инспекторлари Давлат солиқ инспекцияси ходимини ўлдириб қўйгани ҳақида хабарлар тарқалди. Ички ишлар вазирлиги ҳолат бўйича расмий баёнот бериб, бодикамералар олган видеони эълон қилди.
Қайд этилишича, фуқаро А.А. бошқарувидаги Cobalt русумли автотранспорт воситаси светофорнинг қизил чироғидан тўхтамасдан ўтиб, ходимларнинг тўхташ ишорасига бўйсунмасдан, автотранспортда юқори тезликда ҳаракатланиб яширинмоқчи бўлганлиги, шундан сўнг йўл қатнов қисмининг ўртасида тўхтаб, ҳайдовчи автотранспортни ташлаган ҳолда пиёда қочишга уринганлигини маълум қилган.
Сенат ахборот хизмати маълум қилишича, ушбу ҳолат юзасидан Каттақўрғон тумани прокуратураси томонидан жиноят иши қўзғатилиб, тергов ҳаракатлари олиб борилмоқда. Ҳолат юзасидан якуний хулоса тергов жараёнлари ўз ниҳоясига етгандан сўнг маълум қилинади.
«Ўзбекистон Олий Мажлиси Сенатининг Мудофаа ва хавфсизлик масалалари қўмитаси мазкур ҳолат бўйича ўрганиш натижаларини кенг оммага эълон қилади. Ўз навбатида қўмита қонун бузилиш ҳолатининг ҳар қандай кўринишига муросасиз эканлигини билдиради», – дейилади хабарда.
Эслатиб ўтамиз, Бош прокуратура ҳолат бўйича Жиноят кодексининг 206-моддаси (ҳокимият ёки мансаб ваколати доирасидан четга чиқиш) билан жиноят иши қўзғатилганини маълум қилган.
Аввалроқ Қашқадарёда унаштирилган йигит-қизни қўлга олиб, уларни қўйиб юбориш эвазига пул сўраган ИИБ ходимлари ишдан олингани, Қорақалпоғистонда ҳайдовчига қўл кўтарган ЙПХ ходимига нисбатан хизмат текшируви тайинлангани ҳамда Бўстонлиқда Тошкент шаҳар ИИББ ходими иштирокида ЙТҲ юз бергани ҳақида хабар берилганди.
Изоҳ (0)