“O‘zsuvta’minot” AJ Samarqand va Navoiy viloyatlaridagi ichimlik suvi tizimida kuzatilayotgan uzilishlar va o‘chirilishlarga izoh berdi.
Avvalroq Samarqand va Samarqand viloyatining boshqa bir qator tumanlari aholisi suv ta’minotidagi uzilishlarga duch kelayotgani, “Samarqand suv ta’minoti” korxonasi “bu yilgi tabiiy qurg‘oqchilik” haqida ogohlantirgani to‘g‘risida xabar berilgandi.
“Samarqand suv ta’minoti” ma’lumotlariga ko‘ra, hozirda yog‘ingarchiliklarning yo‘qligi va Zarafshon daryosi o‘zanida suv oqimining kamligi sababli yerosti suvlarining sathi (debiti) pastlashib ketgan.
Natijada inshootlardagi nasos uskunalarining mo‘tadil ishlashida yerosti suvi zaxirasining yetishmasligi sababli Samarqand, Kattaqo‘rg‘on shaharlari, Pastdarg‘om, Nurobod, Ishtixon, Kattaqo‘rg‘on, Paxtachi, Narpay, Payariq va Oqdaryo tumanlari aholisini toza ichimlik suvi ta’minotida uzilishlarni olib kelmoqda.
Korxona ma’lumotlariga ko‘ra, “Samarqand suv ta’minoti” suv inshooti tomonidan uzatiladigan ichimlik suvi zaxiralarining cheklangani, yerosti suv zaxiralarining yetishmasligi, shuningdek, suv iste’moli hajmi ortgani sabab uning uzatilishi vaqtincha grafik bo‘yicha amalga oshiriladi.
Samarqand shahri aholisining ichimlik suviga bo‘lgan ehtiyojini qondirish maqsadida suvning uchinchi va to‘rtinchi bosqichdagi ko‘taruvchi nasos orqali yetkazib beriladigan hududida, ya’ni A va B kichik tumanlari, Sartepa, Buyuk ipak yo‘li, Buxoriy va Amir Temur turar joy massivlarida 8-iyundan boshlab ichimlik suvi jadvalga muvofiq — ertalab soat 06:00 dan 10:00 gacha, shuningdek, kechqurun soat 18:00 dan 22:00 gacha uzatiladi.
“Ayni vaqtda ushbu inshootlardagi bosimning kamayib ketgani, yog‘ingarchiliklar kamligi va suv oqining pastligi sabab uzatiladigan zaxira suvlarining sathi pastlashib ketgan. Natijada Navbahor tumanining ayrim hududlarida suv ta’minoti to‘liq to‘xtatilgan”, — deyiladi xabarda.
“O‘zsuvta’minot”ning ta’kidlashicha, “Navoiy suv ta’minoti” MChJ Navbahor tuman bo‘limidagi inshootlarda bosim ko‘tarilguncha, “Kuxron”, “Arabxona”, “Yangiobod”, “Oq oltin”, Qiziloy” mahallalariga ichimlik suvi jadval bo‘yicha maxsus texnikalar yordamida yetkaziladi.
Ma’lumot uchun telefonlar:
- Samarqand — 66−233−18−21, 66 237−09−03;
- Navoiy —79 562−71−37, 99 754−43−02.
Avvalroq YeTTB Namangan viloyatida ichimlik suvi ta’minotini yaxshilashga 70 mln dollar ajratishi, Toshkent shahar hokimligi oqova suvlarini tozalash inshootidan tarqalayotgan yoqimsiz hidni yo‘qotish choralarini o‘rganayotgani haqida xabar berilgandi.
Izoh (0)