«Ўзсувтаъминот» АЖ Самарқанд ва Навоий вилоятларидаги ичимлик суви тизимида кузатилаётган узилишлар ва ўчирилишларга изоҳ берди.
Аввалроқ Самарқанд ва Самарқанд вилоятининг бошқа бир қатор туманлари аҳолиси сув таъминотидаги узилишларга дуч келаётгани, «Самарқанд сув таъминоти» корхонаси «бу йилги табиий қурғоқчилик» ҳақида огоҳлантиргани тўғрисида хабар берилганди.
«Самарқанд сув таъминоти» маълумотларига кўра, ҳозирда ёғингарчиликларнинг йўқлиги ва Зарафшон дарёси ўзанида сув оқимининг камлиги сабабли ерости сувларининг сатҳи (дебити) пастлашиб кетган.
Натижада иншоотлардаги насос ускуналарининг мўътадил ишлашида ерости суви захирасининг етишмаслиги сабабли Самарқанд, Каттақўрғон шаҳарлари, Пастдарғом, Нуробод, Иштихон, Каттақўрғон, Пахтачи, Нарпай, Пайариқ ва Оқдарё туманлари аҳолисини тоза ичимлик суви таъминотида узилишларни олиб келмоқда.
Корхона маълумотларига кўра, «Самарқанд сув таъминоти» сув иншооти томонидан узатиладиган ичимлик суви захираларининг чеклангани, ерости сув захираларининг етишмаслиги, шунингдек, сув истеъмоли ҳажми ортгани сабаб унинг узатилиши вақтинча график бўйича амалга оширилади.
Самарқанд шаҳри аҳолисининг ичимлик сувига бўлган эҳтиёжини қондириш мақсадида сувнинг учинчи ва тўртинчи босқичдаги кўтарувчи насос орқали етказиб бериладиган ҳудудида, яъни А ва B кичик туманлари, Сартепа, Буюк ипак йўли, Бухорий ва Амир Темур турар жой массивларида 8 июндан бошлаб ичимлик суви жадвалга мувофиқ — эрталаб соат 06:00 дан 10:00 гача, шунингдек, кечқурун соат 18:00 дан 22:00 гача узатилади.
«Айни вақтда ушбу иншоотлардаги босимнинг камайиб кетгани, ёғингарчиликлар камлиги ва сув оқининг пастлиги сабаб узатиладиган захира сувларининг сатҳи пастлашиб кетган. Натижада Навбаҳор туманининг айрим ҳудудларида сув таъминоти тўлиқ тўхтатилган», — дейилади хабарда.
«Ўзсувтаъминот»нинг таъкидлашича, «Навоий сув таъминоти» МЧЖ Навбаҳор туман бўлимидаги иншоотларда босим кўтарилгунча, «Кухрон», «Арабхона», «Янгиобод», «Оқ олтин», Қизилой» маҳаллаларига ичимлик суви жадвал бўйича махсус техникалар ёрдамида етказилади.
Маълумот учун телефонлар:
- Самарқанд — 66−233−18−21, 66 237−09−03;
- Навоий —79 562−71−37, 99 754−43−02.
Аввалроқ ЕТТБ Наманган вилоятида ичимлик суви таъминотини яхшилашга 70 млн доллар ажратиши, Тошкент шаҳар ҳокимлиги оқова сувларини тозалаш иншоотидан тарқалаётган ёқимсиз ҳидни йўқотиш чораларини ўрганаётгани ҳақида хабар берилганди.
Изоҳ (0)