Mo‘g‘ulistonda 9-iyun, chorshanba kuni prezident saylovida ovoz berish boshlandi, deb yozadi “TASS”.
Bu yilgi prezidentlik saylovi mamlakat konstitutsiyasiga kiritilgan o‘zgartirishlardan buyon birinchi marta o‘tkazilmoqda. O‘zgartirishlarga ko‘ra, davlat rahbari ushbu lavozimni olti yil davomida qayta saylanish huquqisiz egallashi mumkin.
Ovoz berish mahalliy vaqt bilan 07:00 da (Toshkent vaqti bilan 04:00) boshlandi. Saylovda 3,3 millionga yaqin aholisi bo‘lgan mazkur mamlakatning 2,15 milliondan ortiq fuqarosi ishtirok etishi mumkin. Saylov uchastkalari mahalliy vaqt bilan soat 22:00 gacha (Toshkent vaqti bilan 19:00) ishlaydi.
Bu yilgi saylovda davlat rahbarligi uchun uch nafar nomzod kurash olib bormoqda. Ular hokimiyatdagi Mo‘g‘il xalq partiyasi raisi, mamlakatning sobiq bosh vaziri Uxnaagiyn Xurelsux, muxolifatchi Demokratik partiyaning sobiq raisi Sodnomzunduyn Erdene hamda o‘ng qanot saylovchilari koalitsiyasidan nomzodi qo‘yilgan Buyuk davlat xurali (parlament)ning sobiq deputati Dangaasurengiyn Enxbat.
Eng ko‘p ovoz to‘plagan yoki 50 foiz + 1 dan ortiq ovoz olgan nomzod saylovda g‘olib bo‘ladi. Agar nomzodlarning hech biri ushbu natijaga erisha olmasa, unda eng yuqori ovoz to‘plagan ikki nomzod bilan saylovning ikkinchi bosqichi tashkil etiladi.
Izoh (0)