O‘zbekiston va Qatar hukumatlari o‘rtasida “Havo qatnovi to‘g‘risida”gi bitim imzolandi. Unga ko‘ra, Doha–Toshkent–Doha yo‘nalishida to‘g‘ridan-to‘g‘ri aviaqatnovlarni yo‘lga qo‘yish ko‘zda tutilgan.
Mazkur hujjatga 9-iyun kuni bo‘lib o‘tgan O‘zbekiston TIV rahbari Abdulaziz Komilov va Qatar davlati bosh vaziri o‘rinbosari, tashqi ishlar vaziri shayx Muhammad ibn Abdurahmon ibn Josim Ol Soniy o‘rtasidagi muzokaralar yakunida imzo chekilgan.
Dunyo axborot agentligining ma’lum qilishicha, bitim havo qatnovini tashkil etish, aviakorxonalarni tayinlash, ularga parvozlarni amalga oshirish huquqini berish, belgilanadigan manzillarni aniqlash, sertifikat va litsenziyalarni tan olish, ikki davlatda tayinlangan aviakorxonalarning vakolatxonalari faoliyatini tartibga solish kabi masalalarni nazarda tutadi.
Kelishuvdan shuningdek, O‘zbekiston va Qatar o‘rtasidagi havo qatnovlarini rivojlantirish maqsadida aviatashkilotlarga doimiy qatnovlarni amalga oshirishni ta’minlovchi va bojxona yig‘imlari, soliq va boshqa to‘lovlardan ozod etuvchi imtiyozlar o‘zaro asosda taqdim etilishi o‘rin olgan.
Hujjat ikki tomonlama hamkorlikni yana-da rivojlantirishga ijobiy turtki beradi, ikki mamlakat o‘rtasidagi savdo-iqtisodiy aloqalarni yana-da kengaytirish uchun yangi istiqbollarni ochadi va o‘zaro manfaatli aviatashuvlar bozorini shakllantirishga ko‘maklashadi.
Bundan tashqari, vazirlar uchrashuvda Afg‘onistondagi tinchlik jarayonini ilgari surish, uning ijtimoiy-iqtisodiy infratuzilmasini qayta tiklash bo‘yicha birgalikdagi sa’y-harakatlarini davom ettirishga tayyorligini bildirgan.
Bundan avval Saudiya Arabistonining Flynas aviakompaniyasi O‘zbekistonga muntazam qatnovlarni amalga oshirishni rejalashtirayotgani, Kuvaytning Jazeera Airways aviakompaniyasi O‘zbekistonga muntazam qatnovlarni amalga oshirish uchun ruxsatnoma olgani hamda Air Astana aviakompaniyasi Samarqand va Olmaota o‘rtasida muntazam parvozlarni amalga oshirishi haqida xabar berilgandi.
Izoh (0)