Ўзбекистон ва Қатар ҳукуматлари ўртасида «Ҳаво қатнови тўғрисида»ги битим имзоланди. Унга кўра, Доҳа–Тошкент–Доҳа йўналишида тўғридан-тўғри авиақатновларни йўлга қўйиш кўзда тутилган.
Мазкур ҳужжатга 9 июнь куни бўлиб ўтган Ўзбекистон ТИВ раҳбари Абдулазиз Комилов ва Қатар давлати бош вазири ўринбосари, ташқи ишлар вазири шайх Муҳаммад ибн Абдураҳмон ибн Жосим Ол Соний ўртасидаги музокаралар якунида имзо чекилган.
Дунё ахборот агентлигининг маълум қилишича, битим ҳаво қатновини ташкил этиш, авиакорхоналарни тайинлаш, уларга парвозларни амалга ошириш ҳуқуқини бериш, белгиланадиган манзилларни аниқлаш, сертификат ва лицензияларни тан олиш, икки давлатда тайинланган авиакорхоналарнинг ваколатхоналари фаолиятини тартибга солиш каби масалаларни назарда тутади.
Келишувдан шунингдек, Ўзбекистон ва Қатар ўртасидаги ҳаво қатновларини ривожлантириш мақсадида авиаташкилотларга доимий қатновларни амалга оширишни таъминловчи ва божхона йиғимлари, солиқ ва бошқа тўловлардан озод этувчи имтиёзлар ўзаро асосда тақдим этилиши ўрин олган.
Ҳужжат икки томонлама ҳамкорликни яна-да ривожлантиришга ижобий туртки беради, икки мамлакат ўртасидаги савдо-иқтисодий алоқаларни яна-да кенгайтириш учун янги истиқболларни очади ва ўзаро манфаатли авиаташувлар бозорини шакллантиришга кўмаклашади.
Бундан ташқари, вазирлар учрашувда Афғонистондаги тинчлик жараёнини илгари суриш, унинг ижтимоий-иқтисодий инфратузилмасини қайта тиклаш бўйича биргаликдаги саъй-ҳаракатларини давом эттиришга тайёрлигини билдирган.
Бундан аввал Саудия Арабистонининг Flynas авиакомпанияси Ўзбекистонга мунтазам қатновларни амалга оширишни режалаштираётгани, Кувайтнинг Jazeera Airways авиакомпанияси Ўзбекистонга мунтазам қатновларни амалга ошириш учун рухсатнома олгани ҳамда Air Astana авиакомпанияси Самарқанд ва Олмаота ўртасида мунтазам парвозларни амалга ошириши ҳақида хабар берилганди.
Изоҳ (0)