BMTning Oziq-ovqat va qishloq xo‘jaligi tashkiloti (FAO) hamda Global ekologiya jamg‘armasining (GEF) loyihasi doirasida O‘zbekistonda “O‘rmonloyiha” loyihalash instituti asosida axborot markazi va geoaxborot tizimlari laboratoriyasi tashkil etildi. Bu haqda “Daryo” muxbiri xabar berdi.
Mazkur loyiha O‘rmon xo‘jaligi davlat qo‘mitasi bilan birgalikda amalga oshirilgan. Yangi obyektlar, o‘rmonlarni hisobga olish va monitoring qilishning zamonaviy tizimiga asos bo‘ladi, shuningdek, O‘zbekistonning o‘rmon xo‘jaliklarini keyingi raqamlashtirishiga yordam beradi.
Axborot markazi va GIS-laboratoriyasining tantanali ochilishida vazirlik va muassasalar, xalqaro tashkilotlar, nodavlat notijorat tashkilotlar va OAV vakillari ishtirok etgan.
Axborot markazi o‘rmonlarni barqaror boshqarish maqsadida axborot xizmatlarini taqdim etish yo‘li bilan axborot saqlash va tarqatish vazifasini bajaradi. O‘z navbatida GIS-laboratoriyasi maydonli (geografik) axborotlar va zarur obyektlardagi ular bilan bog‘liq ma’lumotlarni yig‘ish, saqlash, tahlil qilish va grafik vizuallashtirish uchun yangi imkoniyatlarni yaratib beradi.
Axborot markazi va GIS-laboratoriyasi o‘rmon ekotizimini tahlil qilishni takomillashtirish, yo‘ldosh navigatsiyasi vositalaridan foydalanib o‘rmon fondi yerlarini to‘liq hisoblash va monitoring qilinishini amalga oshirish uchun zarur bo‘lgan zamonaviy jihozlarga ega bo‘lgan. O‘rmon xo‘jaligi mutaxassislarida o‘tqazilgan o‘rmon daraxtlarining zamonaviy ro‘yxatini yaratish va uni O‘rmon xo‘jaligining yagona elektron ma’lumotlar bazasiga kiritish imkoni paydo bo‘ldi.
“Endi bizda o‘rmon fondi yerlarining holati to‘g‘risida kelib tushayotgan ma’lumotlarni real vaqt rejimida ishlab chiqish imkoniyati paydo bo‘ldi. Bularning barchasi o‘rmon ekotizimining tahlil qilinishini yaxshilash, degradatsiya va cho‘lga aylanish bilan kurashish bo‘yicha o‘z vaqtida choralar ko‘rish, uzoq muddatli o‘rmon xo‘jalik tadbirlarini rejalashtirish imkonini beradi”, — deydi FAO/GEF’ning “O‘zbekistonning tog‘li va vodiy hududlarida o‘rmonlarni barqaror boshqarish” loyihasi texnik koordinatori Olimjon Qahhorov.
Ta’kidlanishicha, avvallari 2-3 yilda eskirib qoladigan qog‘oz xaritalarga kiritish yo‘li bilan bir yilda 2-5 ta o‘rmon tashkilotlarini hisoblash amalga oshirilgan bo‘lsa, endilikda o‘rmon xo‘jaliklaridagi o‘zgarishlarni real vaqt rejimida elektron xaritalarga kiritish imkoni paydo bo‘lgan.
Izoh (0)