Chexiya parlamenti Senati Belarus muxolifati yetakchisi Svetlana Tixanovskayani mamlakat prezidenti deb tan oldi. Bu haqda Chexiya Senatining spikeri Milosh Vistrchilga tayanib “Korrespondent.net” xabar berdi.
Uning qayd etishicha, u Tixanovskayani Belarus rahbari deb hisoblaydi.
“2020-yilda Belarusda bo‘lgan prezidentlik saylovlari bosim ostida, adolatsiz va g‘ayriqonuniy tarzda o‘tkazildi. Senat Svetlana Tixanovskayani Chexiyaga o‘zining asosiy mehmoni sifatida taklif qilgani, Senat va shaxsan men uni Belarus prezidenti deb tan olishimizni anglatadi”, — dedi Vistrchil.
Ta’kidlanishicha, chexiyalik senatorlar bilan uchrashuvda Tixanovskaya Chexiyaning Belarus muxolifatiga yordam berish yo‘llarini muhokama qildi.
Uch kun oldin Tixanovskaya Varshavaga tashrif buyurib, Polsha prezidenti Anjey Duda bilan uchrashdi. Uchrashuv davomida Belarusda ekstremistik deb tan olingan Nexta Telegram kanalining asoschisi Roman Protasevichning hibsga olinishi bilan bog‘liq vaziyat muhokama qilindi. Uchrashuv yakunlariga ko‘ra, Anjey Duda Polshaning Belarus mustaqilligiga muhtoj ekanini ta’kidladi.
Avvalroq Belarus davlat xavfsizlik qo‘mitasi Svetlana Tixanovskaya, Belarus muxolifati muvofiqlashtirish kengashi rayosatining a’zosi Pavel Latushko, shuningdek, yana 15 nafar fuqaroni terrorchilik faoliyatiga aloqador shaxslar va tashkilotlar ro‘yxatiga kiritdi.
Izoh (0)