Чехия парламенти Сенати Беларусь мухолифати етакчиси Светлана Тихановскаяни мамлакат президенти деб тан олди. Бу ҳақда Чехия Сенатининг спикери Милош Вистрчилга таяниб «Korrespondent.net» хабар берди.
Унинг қайд этишича, у Тихановскаяни Беларусь раҳбари деб ҳисоблайди.
«2020 йилда Беларусда бўлган президентлик сайловлари босим остида, адолатсиз ва ғайриқонуний тарзда ўтказилди. Сенат Светлана Тихановскаяни Чехияга ўзининг асосий меҳмони сифатида таклиф қилгани, Сенат ва шахсан мен уни Беларусь президенти деб тан олишимизни англатади», — деди Вистрчил.
Таъкидланишича, чехиялик сенаторлар билан учрашувда Тихановская Чехиянинг Беларусь мухолифатига ёрдам бериш йўлларини муҳокама қилди.
Уч кун олдин Тихановская Варшавага ташриф буюриб, Польша президенти Анжей Дуда билан учрашди. Учрашув давомида Беларусда экстремистик деб тан олинган Nexta Telegram каналининг асосчиси Роман Протасевичнинг ҳибсга олиниши билан боғлиқ вазият муҳокама қилинди. Учрашув якунларига кўра, Анжей Дуда Польшанинг Беларусь мустақиллигига муҳтож эканини таъкидлади.
Аввалроқ Беларусь давлат хавфсизлик қўмитаси Светлана Тихановская, Беларусь мухолифати мувофиқлаштириш кенгаши раёсатининг аъзоси Павел Латушко, шунингдек, яна 15 нафар фуқарони террорчилик фаолиятига алоқадор шахслар ва ташкилотлар рўйхатига киритди.
Изоҳ (0)